Hingoli Politics : तब्बल तीन वेळा आमदार राहिलेल्या मोठ्या नेत्याने सोडली काँग्रेसची साथ, धनुष्यबाण घेणार हाती

Bhaurao Patil News : आगामी स्थानिक स्वराज संस्था निवडणुकीच्या पार्श्वभूमीवर काँग्रेसला मोठा झटका बसला आहे. काँग्रेसकडून सलग तीन वेळा विधानसभेत विजय मिळवणारे माजी आमदार भाऊराव पाटील यांनी एकनाथ शिंदेंच्या शिवसेनेत जाण्याचा निर्णय घेतला आहे. 2024 च्या विधानसभा निवडणुकीत भाऊराव पाटील यांना काँग्रेसने तिकीट दिले नव्हते. हिंगोलीची जागा महाविकास आघाडीत ठाकरेंच्या शिवसेनेसाठी सोडण्यात आली होती.

हिंगोलीत काँग्रेसची ताकद असूनही ठाकरेंच्या शिवसेनेसाठी जागा सोडल्याने भाऊराव पाटील हे नाराज होते. त्यांनी त्यावेळी पक्षाविरोधात बंडखोरी करून उमदेवारी अर्ज दाखल केला होता. पक्षाकडून त्यांना उमेदवारी अर्ज मागे घेण्याची विनंती करण्यात आली होती. मात्र, ते निवडणूक लढण्यावर ठाम होते. मात्र, त्यांना त्या निवडणुकीत पराभव स्वीकारावा लागला. भाजप उमेदवार तानाजी मुटकुळे हे विजयी झाले.

पराभवानंतर भाऊराव पाटील हे पुन्हा काँग्रेसमध्ये सक्रीय होतील, अशी शक्यता होती. मात्र, पक्षापासून ते आंतर राखून होते.हिंगोली काँग्रेसमध्ये भाऊराव पाटील गोरेगावकर आणि प्रज्ञा सातव असे दोन गट होते. दोन्ही गटांमध्ये अंतर्गतवाद होता. हिंगोली काँग्रेसमध्ये राजीव सातव यांचे महत्त्व वाढल्यानंतर भाऊराव पाटील हे मागे पडले होते. राजीव सातव यांच्यानंतर हिंगोली काँग्रेसची सुत्रे प्रज्ञा सातव यांच्याहाती गेली होती.

मंगळवारी पक्षप्रवेश?

आगामी स्थानिक स्वराज संस्था निवडणुकीच्या पार्श्वभूमीवर माजी आमदार भाऊराव पाटील यांनी धनुष्यबाण हाती घेतल्याने भाजप-काँग्रेस-शिवसेना अशी तिरंगी लढत होण्याची शक्यता आहे. भाऊराव पाटील यांच्या प्रवेशाने शिंदेंना ताकद मिळणार असून स्थानिक स्वराज संस्था निवडणुकीत हिंगोलीत त्यांना मोठे यश मिळेल, अशी शक्यता देखील वर्तवली जात आहे. मिळालेल्या माहितीप्रमाणे ते 14 ऑक्टोबरला (मंगळवारी) शिवसेनेत प्रवेश करण्याची शक्यता आहे.