Abhijeet Dipke news : वर्गातच मुख्याध्यापकाच्या हातात बाटली अन् झोपलेल्या अवस्थेतील व्हिडिओ आला समोर; अभिजीत दिपकेंचा आंदोलनाचा इशारा

Education news : दिल्लीतील आंदोलन यशस्वी झाल्यानंतर कॉक्रोच जनता पार्टीने 'स्कूल ठीक करो' ही मोहीम हाती घेतली आहे. सरकारी शाळांमध्ये जाऊन तेथील पायाभूत सुविधांची झालेली दुरावस्था, शिक्षकांची कमतरता आदी मुद्द्यांवरून प्रशासनाला जाब विचारला जात आहे. या मोहिमेची सुरूवात होताच हिंगोली जिल्ह्यातील एका गावातील सरकारी शाळेतील मुख्याध्यापकांचा धक्कादायक व्हिडिओ समोर आला आहे.

कॉक्रोच जनता पार्टीचे संस्थापक अभिजीत दीपके यांनी स्वातंत्र्यदिनापासून हिंगोली जिल्ह्यातील आपल्या मुळ गावातून 'स्कूल ठीक करो' ही मोहीम सुरू केली. याचदरम्यान त्यांना त्यांच्या गावाशेजारी लिंबाला या गावातील मुख्याध्यापकांच्या कारनाम्यांची माहिती मिळाली. मद्यपी मुख्याध्यापकाविरोधात स्थानिक नागरिकांकडून सातत्याने तक्रार कारवाई होत नसल्याने त्यांनी संताप व्यक्त केला आहे.

दीपके यांनी रविवारी सोशल मीडियात संबंधित मुख्याध्यापकाचे दोन व्हिडिओ पोस्ट केले आहेत. एका व्हिडिओमध्ये विद्यार्थी वर्गात असताना संबंधित मुख्याध्यापक झोपल्याचे दिसून येत आहे. तर दुसऱ्या व्हिडिओमध्ये हे मुख्याध्यापक वर्गातून एक बाटली उचलून वर्गाबाहेर नेत असल्याचे दिसत आहे. दीपके यांनी ही मद्याची बाटली असल्याचा दावा केला आहे.

संबंधित मुख्याध्यापकांना तातडीने निलंबित करण्याची मागणी दीपके यांनी केली आहे. सरकारी शाळेत मद्यपी मुख्याध्यापक कसा असू शकतो? हा मुले आणि प्रामुख्याने लहान मुलींच्या सुरक्षेचा गंभीर प्रश्न आहे, असे दीपके यांनी म्हटले आहे. त्याआधीत दीपके यांनी रविवारी सकाळी केलेल्या पोस्टमध्ये आंदोलनाचा इशारा दिला आहे.

ग्रामस्थांकडून संबंधित मुख्याध्यापकाला निलंबित न केल्यास मंगळवारी आंदोलन केले जाणार आहे. त्या आंदोलनात आपणही सहभागी होऊ, असा इशारा दीपके यांनी दिला आहे. शाळेत पाच वर्ग असून केवळ दोनच शिक्षक आहेत. या मुद्याकडेही दुर्लक्ष करता येणार नाही, असेही दीपके यांनी म्हटले आहे. दरम्यान, दीपके यांच्याकडून शनिवारी एका शाळेतील स्वच्छतागृहातील दुरावस्थेचे व्हिडिओ पोस्ट करत सरकारला जाब विचारला होता.