NCP Vs Congress : स्थानिकच्याआधी काँग्रेसला हादरा, तटकरेंच्या गळाला लागला काँग्रेसचा बडा नेता; तळकोकणात ताकदही वाढली

Ratnagiri News : आगामी स्थानिकच्या पार्श्वभूमिवर नुकताच जिल्हापरिषद, पंचायत समिती सभापती आणि आता नगरपरिषद आणि नगरपंचायतींच्या नगराध्यक्षपदाच्या आरक्षणाची घोषणा झाली आहे. यामुळे निवडणुकांचे पडघम वाजण्यास सुरूवात झाली आहे. राजकीय पक्षांसह इच्छुकांकडून आता मोर्चे बांधणीला सुरूवात होणार आहे. अशा धामधुमीच्या वेळीच काँग्रेसला मोठा धक्का अजित पवार यांच्या राष्ट्रवादी काँग्रेसने दिला आहे. मंडणगड तालुक्यातील काँग्रेसचा बडा नेताच राष्ट्रवादीने फोडला आहे. ज्यामुळे तालुक्यातील राजकीय समीकरणांमध्ये मोठे बदल होण्याची शक्यता आहे.

मंडणगड तालुक्यातील भिंगळोली येथील श्रीकृष्ण सभागृहात आयोजित कार्यकर्ता मेळाव्यात राष्ट्रवादीचे प्रदेशाध्यक्ष, खासदार सुनील तटकरे आणि मौलाना अबुल कलाम आझाद आर्थिक विकास महामंडळाचे अध्यक्ष मुश्ताक अंतुले यांच्या उपस्थितीत राष्ट्रवादी काँग्रेस पक्षात पक्ष प्रवेशाचा सोहळा झाला. यावेळी काँग्रेसचे तालुकाध्यक्ष मुश्ताक मिरकर यांनी जाहीर प्रवेश केला. मिरकर यांच्यासह शेकडो कार्यकर्त्यांनीही राष्ट्रवादीत प्रवेश केला. या प्रवेशामुळे तालुक्यासह जिल्ह्यातील राजकारणाला वेगळे वळण लागण्याची शक्यता आहे.

मुश्ताक मिरकर हे 2009 पासून काँग्रेसचे तालुकाध्यक्ष म्हणून कार्यरत होते. याशिवाय त्यांनी तालुका समन्वय समिती अध्यक्ष, संजय गांधी निराधार योजना तालुका समिती अध्यक्ष तसेच पंचायत समिती सदस्य म्हणूनही जबाबदाऱ्या सांभाळल्या आहेत. काँग्रेस सोडून समविचारी विचारधारेच्या राष्ट्रवादी काँग्रेस पक्षात त्यांनी प्रवेश केल्याने आगामी जिल्हा परिषद आणि पंचायत समिती निवडणुकांवर निर्णायक परिणाम होणार असल्याचे संकेत मिळत आहेत.

त्यांच्या प्रवेशामुळे राष्ट्रवादी काँग्रेसची ताकद दुपटीने वाढली आहे. या जनशक्तीचा वापर आपण तालुक्याच्या सर्वांगीण विकासासाठी करू, असे आश्वासन तटकरे यांनी यावेळी दिले आहे. तर विकासाच्या नव्या अध्यायाची सुरवात आजच्या दिवशी झाली असल्याचेही तटकरे यांनी म्हटलं आहे.

तर आपल्या पंचक्रोशीतील अनेक विकासकामे प्रलंबित असून खासदार सुनील तटकरे यांचे नेतृत्वात ती मार्गी लागण्यास मदत होईल. तर राष्ट्रवादी काँग्रेसची समविचारी विचारधारा आपल्यासाठी प्रेरणादायी असेल्यानेचे आपण राष्ट्रवादीत प्रवेश करण्याचा निर्णय घेतल्याचे मुश्ताक मिरकर यांनी म्हटलं आहे.

FAQs :

प्रश्न 1: मुश्ताक मिरकर कोण आहेत?
👉 ते काँग्रेसचे तालुकाध्यक्ष असून स्थानिक स्तरावर प्रभावी नेते म्हणून ओळखले जातात.

प्रश्न 2: त्यांनी कोणत्या पक्षात प्रवेश केला?
👉 त्यांनी अजित पवार यांच्या राष्ट्रवादी काँग्रेस पक्षात प्रवेश केला आहे.

प्रश्न 3: त्यांच्या प्रवेशामुळे कोणाला धक्का बसला आहे?
👉 काँग्रेस पक्षाला मोठा धक्का बसला असून स्थानिक संघटनात बदल घडू शकतो.

प्रश्न 4: हा प्रवेश कुणाच्या उपस्थितीत झाला?
👉 राष्ट्रवादीचे प्रदेशाध्यक्ष आणि खासदार सुनील तटकरे यांच्या उपस्थितीत.

प्रश्न 5: या प्रवेशाचा निवडणुकांवर काय परिणाम होऊ शकतो?
👉 स्थानिक पातळीवर राष्ट्रवादी काँग्रेसचा प्रभाव वाढण्याची आणि काँग्रेसची ताकद कमी होण्याची शक्यता आहे.