Raigad Crime : मंगेश काळोखेंची हत्या 'कॉन्ट्रॅक्ट किलर'नेच केली; बेड्या पडताच गुन्ह्याची कबुली देत सुपारीचा आकडाही सांगितला

Raigad News : खोपोलीमधील माजी नगरसेवक मंगेश काळोखे यांच्या खून प्रकरणात मोठी अपडेट समोर आली आहे. या हत्येतील फरार आरोपीला पुण्यातील हडपसरमधील हांडेवाडी भागातून वानवडी पोलिसांनी केली आहे. तर पोलिसांनी केलेल्या चौकशीत काळोखेंच्या हत्या सुपारी घेऊन केल्याची कबुली आरोपीने दिली आहे. खालीद खलील कुरेशी (वय २३) असे त्याचे नाव असून या प्रकरणातील मुख्य सुत्रधार हा रवींद्र देवकरच असल्याचे त्याने सांगितले आहे. तर या हत्येसाठी २० लाख रुपयांच्या सुपारी मिळाल्याचेही त्याने म्हटलं आहे.

शिवसेना माजी नगरसेवक मंगेश काळोखे यांच्या निर्घृण हत्याकांडाने रायगडच्या राजकीय आणि सामाजिक वर्तुळात खळबळ उडवून दिली होती. या प्रकरणात १२ जणांना अटक करण्यात आली आहे. दरम्यान आता या निर्घृण हत्याकांडाचा रायगड पोलिसांनी यशस्वी उलगडा केला असून ही हत्या केवळ राजकीय वादातूनच झाल्याचे समोर आले आहे. पोलिसांनी केलेल्या तपासात मंगेश काळोखे यांची हत्या २० लाख रुपयांच्या सुपारी देवून केल्याचे समोर आले आहे.

पोलिसांनी दिलेल्या माहितीनुसार, मंगेश काळोखे यांच्या हत्येचा कट अत्यंत नियोजनबद्ध करण्यात आला. या हत्येचा मुख्य सूत्रधार हा अजित पवार यांच्या राष्ट्रवादीचे रवींद्र देवकर असून त्याने इशा पापा शेख हिच्या मध्यस्थीने कॉन्ट्रॅक्ट किलर्सशी संपर्क साधला. त्यांना २० लाख रुपयांची सुपारी दिली.

ज्यात आदिल मुखत्यार शेख, खालीद खलिल कुरेशी आणि इतर साथीदारांचा समावेश होता. पण हत्याकांड केल्या नंतर हे आरोपी पसार झाल्याने त्यांचा शोध घेणं सुरू होते.दरम्यान पुण्याच्या वानवडी पोलिसांनी खालीद खलिल कुरेशी (वय २३) याला हडपसर भागातून शिताफीने ताब्यात घेतले. ज्यानंतर त्याने या गुन्ह्याची कबुली दिलीय.

सकाळचा तो थरार

खोपोलीतील जया बार परिसरात २६ डिसेंबर २०२५ रोजी सकाळी ७ च्या सुमारास मंगेश काळोखे आपल्या मुलींना शाळेत सोडून येत होते. यावेळी तेथे दबा धरून बसलेल्या हल्लेखोरांनी त्यांचा काळ्या रंगाच्या कारमधून पाठलाग केला. तोंडाला रुमाल बांधलेल्या ५ ते ६ जणांनी ते खाली पडताच त्यांच्यावर तलवार, कोयता आणि कुऱ्हाडीने सपासप वार केले. या सर्व हल्लेखारोनी त्याच्या चेहरा आणि डोक्यावर वार केले. या भीषण हल्ल्यात काळोखे यांचा जागीच मृत्यू झाला होता.

आता ही हत्या फक्त राजकीय वादातून झाल्याचे समोर येत नसून याला निवडणुकीचा निकाल आणि जुने वैमनस्यही कारण असल्याचे समोर येत आहे. नुकत्याच झालेल्या खोपोली नगरपालिका निवडणुकीत मंगेश काळोखे यांच्या पत्नी मानसी काळोखे शिंदेंच्या शिवसेनेच्या तिकीटावर उभारल्या होत्या. त्यांच्याविरोधात अजित पवार यांच्या राष्ट्रवादीच्या रवींद्र देवकर यांच्या पत्नी उर्मिला देवकर होत्या. या निवडणुकीत देवकर यांच्या पत्नी उर्मिला देवकर यांचा पराभव झाला. हा पराभव आणि याच्याआधी काळोखे आणि देवकर यांच्या असणारे वाद यातूनच या हत्येचा कट रचला गेला. ज्यातून २० लाखांची सुपारी देवून काळोखे यांची हत्या करण्यात आला.

दरम्यान आतापर्यंत या हत्या प्रकरणात १२ जणांना अटक करण्यात आली असून यात मुख्य आरोपी रवींद्र देवकर, त्याचा मुलगा धनेश देवकर, पत्नी उर्मिला देवकर (माजी नगरसेविका), इशा पापा शेख (मध्यस्थ), खालीद खलिल कुरेशी, आदिल मुखत्यार शेख (शूटर) दर्शन देवकर, सचिन चव्हाण यांच्यासह अन्य काहींचा समावेश आहे.

राष्ट्रवादी काँग्रेसच्या पदाधिकाऱ्यांचा समावेश नाही

एकीकडे पुणे पोलिसांनी या प्रकरणात दोघांना अटक केल्यानंतर खोपोली हत्याकांडाचे धागेदोरे हाती लागले. यानंतर रायगड पोलिसांनी या प्रकरणात मुख्य सूत्रधारासह कॉन्ट्रॅक्ट किलर्सचा शोध घेत आरोपींना गडाआड केले आहे. पण दुसरीकडे या प्रकरणात राष्ट्रवादी काँग्रेसचे जिल्हाध्यक्ष सुधाकर घारे आणि भरत भगत यांचीही नावे चर्चेत होती. त्यांना अटक झालेली नाही. त्यांचा या प्रकरणात थेट सहभाग आढळलेला नसल्याचे पोलिस अधीक्षक आचंल दलाल यांनी आधीच सांगितले आहे. तर एक आरोपी फरार असून त्याचा कसून शोध पोलिस घेत आहेत.

FAQs :

Q1. मंगेश काळोखे हत्या प्रकरणात कोणाला अटक झाली?
➡️ खालीद खलील कुरेशी (वय 23) याला पुण्यातील हडपसर येथून अटक झाली.

Q2. हत्या कोणत्या कारणामुळे करण्यात आली?
➡️ 20 लाख रुपयांच्या सुपारीसाठी हत्या करण्यात आल्याची कबुली आरोपीने दिली.

Q3. या प्रकरणातील मुख्य सूत्रधार कोण आहे?
➡️ रवींद्र देवकर हा मुख्य सूत्रधार असल्याचे आरोपीने सांगितले.

Q4. अटक कुठे आणि कोणत्या पोलिसांनी केली?
➡️ पुण्यातील हडपसरमधील हांडेवाडी भागातून वानवडी पोलिसांनी अटक केली.

Q5. या प्रकरणाचा तपास कोणत्या टप्प्यात आहे?
➡️ तपास अंतिम टप्प्यात असून आणखी खुलासे होण्याची शक्यता आहे.