Shivsena Corporator Controversy : शिंदेंच्या नगरसेविकेकडे दोन शिधापत्रिका अन् दोन राज्यांतील तीन मतदार ओळखपत्रे? काँग्रेस महिला नेत्याचा खळबळजनक दावा

BMC Fake Documents Political Allegation Controversy : नुकताच मुंबई महानगरपालिकेच्या निवडणूका झाल्या असून प्रभाग क्रमांक १ मधून शिंदेंच्या शिवसेनेच्या रेखा यादव विजयी झाल्या आहेत. पण आता त्या अडचणीत येण्याची शक्यता असून त्या बनावट कागदपत्रांच्या आधारे निवडून आल्याचा आरोप काँग्रेसच्या माजी नगरसेविका शीतल म्हात्रे यांनी केला आहे. तसेच म्हात्रे यांनी रेखा यादव यांनी खोटे शपथपत्र सादर करून प्रकल्पबाधितांसाठी राखीव असलेलं घरही लाटल्याचा आरोप पत्रकार परिषदेत केला आहे. तर याबाबत पुरावे सादर करत म्हात्रे यांनी रेखा यादव यांच्याकडे दोन शिधापत्रिका, दोन राज्यांतील तीन मतदार ओळखपत्रे असल्याचा खळबळजनक दावा देखील केला आहे. या पत्रकार परिषदेला काँग्रेसचे गटनेते अशरफ आझमी उपस्थित होते.

'लोकसत्ता'त आलेल्या वृत्तानुसार मुंबई महानगरपालिकेच्या ७९ नगरसेवकांची विविध प्रकरणे न्यायालयात असतानाच काँग्रेसकडून अशा पद्धतीने गंभीर आरोप करण्यात आली आहेत. ज्यामुळे शिवसेनेत खळबळ उडाली असून शीतल म्हात्रे यांनी रेखा यादव यांच्यावर आरोपांची तोफ डागली आहे.

शीतल म्हात्रे यांनी, रेखा यादव यांच्याकडे दोन शिधापत्रिका असल्याचा दावा करत महापालिका आयुक्त अश्विनी भिडे, पोलीस आयुक्त यांच्याकडे तक्रार दाखल केल्याचे म्हटलं आहे. तसेच या प्रकरणात रेखा यादव यांच्याविरोधात तत्काळ गुन्हा दाखल करून घेण्यात यावे. तसेच चौकशी करून दोन्ही शिधापत्रिका रद्द करण्यात याव्यात, अशी मागणी देखील म्हात्रे यांनी पत्रकार परिषदेत केली आहे.

दरम्यान, म्हात्रे यांनी रेखा यादव यांच्यावर आणखी एक गंभीर आरोप केला असून महापालिकेच्या पुनर्वसन योजनेअंतर्गत मोफत पुनर्वसन सदनिका लाटल्याचेही म्हटले आहे. महापालिकेच्या एल. टी. रोड रुंदीकरण पुनर्वसन योजनेअंतर्गत त्यांनी ही सदनिका लाटली आहे. मात्र नुकत्याच झालेल्या निवडणुकीच्या शपथपत्रात त्यांनी स्वतःकडे किंवा त्यांच्या पतीकडे कोणतीही मालमत्ता नसल्याचे म्हटले आहे.

यामुळे निवडणूक आयोगाला यादव यांनी खोटे शपथपत्र सादर कत दिशाभूल केली आहे. यादव यांनी प्रकल्पबधितांसाठी राखीव असलेले घरच लाटल्याचा दावा म्हात्रे यांनी करत खोट्या शपथपत्राद्वारे मिळविलेली सदनिकेचा लाभ रद्द करावा. यादव यांच्याकडून दंडासह वसुली करण्यात यावी असे म्हणत हे फक्त आरोप नसून आपल्याकडे अधिकृत कागदपत्रे आहेत. माहिती अधिकार कायद्याअंतर्गत सर्व पुरावे आपण गोळा केल्याचा दावा म्हात्रे यांनी केला आहे.

दरम्यान आता हे प्रकरण न्यायप्रविष्ट असून याबाबत आपण आपले म्हणणे आणि सर्व कागदपत्रे न्यायालयात सादर केले आहे. यामुळे या आरोपांवर आपण आता बोलणार नाही असे स्पष्टीकरण नगरसेविका रेखा यादव यांनी नगरसेविका रेखा यादव यांनी सांगितले आहे.