Nilesh Rane : "माझ्यासोबत काय होणार याची कल्पना...,निलेश राणेंनी तयारीनिशी भाजपला अंगावर घ्यायचं ठरवलंय

Nilesh Rane News : मालवण, : भिजलेला माणूस पावसाला घाबरत नसतो. मला हे सगळे करत असताना माझ्यासोबत काय काय होणार याची कल्पना आहे. माझ्यावर कितीही आरोप करायचा प्रयत्न केला तरी माझे हात स्वच्छ आहेत. तुमचे हात स्वच्छ व्हावे यासाठी हा प्रयत्न आहे, असे आमदार निलेश राणे यांनी पत्रकारांशी बोलताना स्पष्ट केले.

येथे भाजप पदाधिकार्‍याच्या घरात पैसे सापडल्याच्या कथीत प्रकरणी पुढील पाऊल काय असेल हे त्यांनी पत्रकारांशी बोलताना सांगितले. ते म्हणाले, “मी माझ्या पक्षाचे काम करत आहे आणि करत राहणार. कुठेही काही चुकीचे होत असल्याचे आढळले तर मी आवाज उठवणार. माझ्याकडे असलेल्या पुराव्यांच्या आधारे मी बोलतोय. तुम्ही माझ्यावर टिका करू शकता, पण या सगळ्याचा मी कायदेशीर मार्गाने पाठपुरावा करणार. माझा भाजप प्रदेशाध्यक्षांवर आरोप आहे.

या सगळ्या प्रकरणात जे कोण दोषी असतील ते वाचू शकणार नाहीत. कारण आमचा न्याय व्यवस्थेवर विश्‍वास आहे. आमच्यावर आरोप असेल तर पुरावा दाखवा. त्यावर बोलू. तुमच्याकडे सगळी सत्ता आहे. तुम्ही सगळी यंत्रणा लावू शकता. करून टाका जे करायचे आहे ते. भिजलेला माणूस पावसाला घाबरत नसतो. मला हे सगळे करायचे आहे तर मला हीही खात्री आहे की, माझ्यासोबत काय काय होणार आहे. माझ्यावर कितीही आरोप करायचा प्रयत्न केला तरी माझे हात स्वच्छ आहेत. तुमचे हात स्वच्छ व्हावे यासाठी हा निलेश राणेचा प्रयत्न आहे.”

पालकमंत्री नितेश राणे यांच्या वक्तव्यावर ते म्हणाले, “उदय सामंत येवून गेलेत. त्यानंतर लगेचच आरोप करायला हवे होते. तेव्हा गप्प का राहिला. मी तक्रार केली. मला वाटले गडबड आहे तेव्हा त्याचा पाठपुरावा केला. मला काहीतरी सापडलं अस काही घडत आहे असे तुम्हाला वाटत असेल तर तुम्ही तक्रार करायला हवी होती. लोकशाही आहे.”

निलेश राणे म्हणाले, “या प्रकरणी गुरूवारी (ता.२७) निवडणुक अधिकार्‍यांची वेळ घेवून त्यांच्या कार्यालयात तसेच नंतर पोलिस ठाण्यात गेलो. त्यांना पुढची प्रक्रिया काय? हे विचारले. त्यांनी पैसे जप्त केल्याचे सांगितले. पैसे जप्त केले म्हणजे गुन्हा झाला. त्यांनी समिती समोर आपले म्हणणे दिले असल्याचे स्पष्ट केले; मात्र याला 24 तास उलटूनही गुन्हा दाखल होणे सोडाच संबंधिताला नोटीसही गेलेली नाही. ते हे पैसे आपल्या व्यवसायातून आल्याचे ते सांगत आहेत; मात्र कारणे दाखवा नोटीस बजावण्याची प्रक्रिया असते. प्रशासनाने संबधिताना साधे बोलावलेही नाही. हे अपेक्षीतच होते. त्यामुळे मी वकीलांशी बोलणार आहे. मी ‘प्रोसिजर’ पाळणारा माणूस आहे. सरकारी प्रक्रियेला जो वेळ लागतो तितका त्यांना द्यायला हवा, पण यात अती करू नये. आम्हाला केवळ गृहीत धरू नये. यासाठी कायदेशीर सल्ला घेवून पुढचे पाऊल उचलणार आहे.”

भाजप पदाधिकारी विजय केनवडेकर यांनी काल पत्रकार परिषद घेवून केलेल्या वक्यव्यावर ते म्हणाले, “मी त्यांच्या घरात परवानगी मागून गेलो होतो. त्यांनी मला यायला सांगितले. त्यांनी तेथेच मला थांबवायला पाहिजे होते. मग माझा प्रवेश अनधिकृत कसा? मला त्यांनी बसायलाही सांगितले; पण मी बसलोही नाही. उद्या सरकारी वनक्षेत्रात एखादा गुन्हा घडत असेल आणि मी आरोपीचा पाठलाग केला तर सरकार माझ्यावर गुन्हा दाखल करणार का? मी पोलिसांना गुन्हा शोधून दिला आहे. त्यामुळे आपण काय आरोप करतोय याचा विचार करायला हवा. त्यांना विषय दुसरीकडे न्यायचा आहे. हे मी होवू देणार नाही. पैसे आले कोठून, कोणाचे आहेत, तेवढेच होते की आणखी होते; जर धंद्यातून आले असतील तर त्याचे पुरावे यासाठीचा सगळा पाठपुरावा करणार आहे.”

पुढे ते म्हणाले, “हे सगळे जनतेसमोर आणणे हे माझे काम आहे. सरकारी यंत्रणा त्यावर कसा प्रतिसाद देत आहेत, हे सगळेच बघत आहेत. संबंधितांना अद्याप साधी नोटीसही नाही. रक्कम जप्त करायला आम्ही जबरदस्ती केली नव्हती. ती जप्त केली म्हणजे गुन्हा झाला. पाणी कुठे तरी मुरतच आहे. यात ‘एफआयआर’ दाखल व्हायला हवी. पुरावे नष्ट करायला जे उभे होते, त्यांच्यावरही गुन्हा दाखल व्हायला हवा. मला नाकासमोर जे दिसते ते मी करतो. माझे कार्यकर्ते घरदार विकून निवडणुका लढतायेत, ते बघून मला त्रास होतो. एका बाजूला गरिबीत निवडणुक होते आणि दुसरीकडे श्रीमंतीत. मला यातून काहीच मिळवायचे नाही. याची सुरूवात चांगल्यासाठी झाली असेल तर मला समाधान आहे. हे थांबणार असेल तर त्यात माझा खारीचा वाटा आहे, हे माझ्यासाठी समाधान असेल. पण त्याच्याही पलिकडे हे थांबणार असे मलाही वाटत नाही. माझे पाय जमिनीवर आहेत. निवडणुकीपर्यंत माझे लक्ष आहे. हे पूर्ण महाराष्ट्रात सुरू आहे. त्या त्या भागातील लोक सतर्क राहिले आणि ही व्यवस्था पकडून दिली तरच महाराष्ट्राचे चित्र बदलेल.”

भाजप प्रदेशाध्यक्ष रवींद्र चव्हाण यांनी जळगाव येथे पत्रकारांशी बोलताना आम्हाला २ तारीख पर्यंत युती टिकवायची आहे असे वक्तव्य केले होते. यावर राणे म्हणाले, “प्रदेशाध्यक्ष चव्हाण यांना काय म्हणाचे आहे ते त्यांना विचायला हवे; पण त्यांच्या मनात काय आहे हे स्पष्ट आहे. ही मित्र पक्षांना थेट धमकी आहे असे मी समजतो. कदाचीत त्यांच्या मनात काहीतरी वेगळे असेल. वेगळ्या उद्देशाने बोलले असतील.

निलेश राणे पुढे बोलताना म्हणाले, "प्रदेशाध्यक्ष चव्हाण आणि मुख्यमंत्री देवेंद्र फडणवीस यांच्याबद्दल माझ्या मनात कायमच आदर आहे आणि राहणार आहे. निवडणुका संपल्यानंतर त्या दोघांचीही वेळ घेऊन भेट घेणार आहे. काय घडले? ते सांगणार आहे. ते दोघेही आजही आमचे नेते आहेत आणि पुढेही राहतील. युती हे कुटुंब टिकावे, असे आजही वाटते. त्यामुळे त्यांचे गैरसमज झाले असतील तर ते दूर करणार आहे."