रायगड जिल्हा परिषद निवडणुकीच्या पार्श्वभूमीवर महायुतीतील शिवसेना आणि राष्ट्रवादी काँग्रेसमध्ये कार्यकर्त्यांना खेचण्याची चढाओढ सुरू आहे.
दोन्ही पक्षांतून नेते आणि पदाधिकारी एकमेकांच्या संपर्कात असल्याची चर्चा आहे.
त्यामुळे आगामी निवडणुकीत राष्ट्रवादी विरुद्ध शिवसेना अशी थेट लढत होण्याची शक्यता वर्तवली जात आहे.
Raigad News : रायगड जिल्ह्यामध्ये तब्बल 4 वर्षानंतर जिल्हा परिषद, पंचायत समित्यांच्या निवडणुका होत आहेत. स्थानिक पातळीवरील या निवडणुकीची जोरदार मोर्चेबांधणी केली जात आहे. आपल्या पक्षाचे आणि आपले प्राबल्य राखण्यासाठी महायुतीमधील भाजप, शिवसेना आणि राष्ट्रवादी यांच्यात रस्सीखेच पाहायला मिळत आहे. यातगी शिवसेना आणि राष्ट्रवादी हे पक्ष एकमेकांवर तुटून पडले असून भाजप मात्र वेट ॲण्ड वॉचच्या भूमिकेत दिसत आहे
राष्ट्रवादीचे प्रदेशाध्यक्ष, खासदार सुनील तटकरे आणि एकनाथ शिंदे यांच्या शिवसेनेचे नेते, रोहयो मंत्री भरत गोगावले यांच्यातील वाद विकोपाला गेला आहे. पालकमंत्रिपदावरून सुरू झालेला वाद स्वबळाच्या नाऱ्यापर्यंत पोहोचला आहे. तटकरे आणि गोगावले यांनी परस्परांना स्वबळावर लढू असा इशाराही दिलेला आहे. त्याचवेळी स्वबळासाठी ताकद एकवटण्यासाठी एकमेकांचे नेते, पदाधिकाऱ्यांना पायघड्या घातल्या जात आहेत.
आतापर्यंत शिवसेनेतून राष्ट्रवादीमध्ये आणि राष्ट्रवादीमधून शिवसेनेत बऱ्याच पदाधिकारी आणि कार्यकर्त्यांनी प्रवेश केला आहे. याशिवाय इतरही पक्षांमधून दोन्ही पक्षांमध्ये नेते आयात केले जात आहेत. नुकतेच तटकरे यांचे निकटवर्तीय असणारे विकास गायकवाड यांना शिवसेनेत घेत गोगावले यांनी राष्ट्रवादीला सुरूंग लावला. मग गोगावले यांचे विश्वासू सहकारी असलेले शिवसेनेचे उपजिल्हाप्रमुख रमेश मोरे यांना राष्ट्रवादीत घेऊन तटकरेंनी देखील पलटवार केला होता.
यापूर्वीही .........
आगामी स्थानिकचा बिगुल वाजला असून शिवसेना आणि राष्ट्रवादीतील वाद एकमेंकाच्या पक्ष फोडण्यापर्यंत पोहचला आहे. नुकताच विकास गायकवाड शिवसेनेचे उपजिल्हाप्रमुख रमेश मोरे यांच्या पक्ष प्रवेशामुळे जिल्ह्यात खळबळ उडाली होती. त्यापाठोपाठ भाई सुर्वे यांनी पक्ष बदलण्याने रायगडच्या राजकारणात भूकंपच आला आहे. पण याआधी देखील आंबेवाडी जि. प. मतदारसंघाचे माजी सदस्य दया पवार, रोठ सरपंच गीता मोरे, जनार्दन मोरे यांच्यासहित राष्ट्रवादी काँग्रेस पक्षाच्या शेकडो कार्यकर्त्यांनी शिवसेनेत जाहीर प्रवेश केला होता.
तर माजी सरपंच संजय देशमुख यांना देखील गोगावले यांनी फोडले होते. यामुळे राष्ट्रवादीची मोठी हानी झाल्याची चर्चा सुरू होती. अशातच तटकरे यांनी शिवसेनेला जोरदार धक्का देत युवासेना राज्य सचिव आणि कोकण समन्वयक रुपेश पाटील, समाजसेवक तेजस ढकी, युवासेना जिल्हा अध्यक्ष रोशन पवार, युवासेना विधानसभा अध्यक्ष रोशन कृष्ण पुजारी, खारघर उपशहर प्रमुख शैलेश शिंदे, खारघर महिला शहर प्रमुख चंचला संदेश बनकर, मुस्लिम युवा नेते हाजी मुद्दस्सर पटेल आदींचा राष्ट्रवादीत प्रवेश करून घेतला. या प्रवेशामुळे उरणपासून पोलादपूरपर्यंत राष्ट्रवादीचे संघटन अधिक भक्कम होईल, असा दावा करण्यात आला होता.
काही दिवसांपूर्वी तटकरेंनी गोगावलेंसह शिवसेना आमदार महेंद्र दळवी यांच्या मतदार संघात जोरदार धक्का दिला होता. शिवसेनेचे नेते भाई सुर्वे यांनी आपल्या कार्यकर्त्यांसह राष्ट्रवादी काँग्रेस पक्षात प्रवेश केला. एकूणच दक्षिण रायगडसह अलिबाग, मुरुड, कर्जत या तालुक्यात महायुतीतीमध्येच पक्ष वाढीसाठी मित्रपक्ष सध्या भांडताना दिसत आहेत.
मविआ गोंधळल्या अवस्थेत
या साऱ्या राजकीय गदारोळात रायगड जिल्ह्यातील महाविकास आघाडी मात्र गोंधळलेल्या अवस्थेत दिसत आहे. शिवसेना उद्धव बाळासाहेब ठाकरे, शेकाप या प्रमुख पक्षांची वाताहात झाली आहे. महायुतीच्या नेत्यांकडून बसणाऱ्या पक्षफुटीच्या धक्क्यातून सावरायचे कसे याचीच चिंता आघाडीतील पक्षांना सध्या लागलेली आहे.
भाजपचा किल्ला मजबूत
महायुतीचा प्रमुख घटक पक्ष असलेल्या भाजपने रायगड जिल्ह्यात आपला किल्ला मजबूत केला असून दक्षिण रायगडमध्ये खा. धैर्यशील पाटील राजकीय घडामोडींकडे लक्ष देवून आहेत. सध्या भाजप राष्ट्रवादी, शिवसेनेच्या कलगीतुऱ्यात न पडता स्वबळावर लक्ष केंद्रीत करत आहे. यासाठी खा. पाटील यांच्या जोडीला माजी आम.पंडित पाटील, माजी जि.प.अध्यक्ष आस्वाद पाटील, चित्रा पाटील यांची टीम काम करत आहे.
1. कोणत्या निवडणुकीच्या पार्श्वभूमीवर ही स्पर्धा सुरु आहे?
रायगड जिल्हा परिषद निवडणुकीच्या पार्श्वभूमीवर ही चढाओढ सुरु आहे.
2. कोणते पक्ष एकमेकांविरुद्ध स्पर्धेत आहेत?
शिवसेना आणि राष्ट्रवादी काँग्रेस या दोन पक्षांमध्ये स्पर्धा दिसून येत आहे.
3. ही लढत महायुतीतील अंतर्गत संघर्ष म्हणून पाहिली जात आहे का?
होय, ही महायुतीतील मित्रपक्षांतील अंतर्गत राजकीय स्पर्धा मानली जात आहे.
4. कोणत्या भागात सर्वाधिक पळवापळवी होत आहे?
रायगड जिल्ह्यातील विविध तालुक्यांमध्ये नेते आणि कार्यकर्त्यांमध्ये हालचाली वाढल्या आहेत.
5. आगामी निवडणुकीत काय अपेक्षित आहे?
राष्ट्रवादी विरुद्ध शिवसेना अशी थेट लढत होण्याची शक्यता वर्तवली जात आहे.
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.