Shivsena politics : नगराध्यक्षपदावर शिवसेनेचा दावा, माजी मंत्र्याच्या वक्तव्यामुळे महायुतीत अंतर्गत मतभेद वाढण्याची शक्यता?

Sawantwadi News : राज्यातील रखडलेल्या स्थानिकच्या निवडणुकांना आता वेग येण्यास सुरूवात झाली आहे. जिल्हापरिषद, पंचायत समिती पाठोपाठ आता नगरपरिषदा आणि नगरपंचायतीच्या नगराध्यक्षाचे आरक्षणही जाहीर झाले आहे. या जाहीर झालेल्या आरक्षणानंतर आता मालवण, वेंगुर्ले, सावंतवाडी नगरपालिका आणि कणकवली, वाभवे-वैभववाडी, कुडाळ, देवगड नगरपंचायतींमध्ये इच्छुकांकडून मोर्चे बांधणी सुरू झाली आहे. तर महायुतीत जागा वाटपाच्याआधीच दावेदारी सुरू झाल्याचे पाहायला मिळत आहे.

जिल्ह्यातील वेंगुर्ले, वाभवे-वैभववाडी, कुडाळ, देवगड, दोडामार्ग सर्वसाधारणासाठी खुले झाले आहे. तर सावंतवाडी सर्वसाधारण महिला आणि मालवण नागरिकांचा मागास प्रवर्ग (महिला) आणि कणकवली नागरिकांचा मागास प्रवर्ग अशाप्रकारे आरक्षित झाला आहे. मालवण आणि सावंतवाडी नगरपरिषदेवर महिलाराज राहणार आहे.

अशातच सावंतवाडी नगरपरिषदेच्या आरक्षित झालेल्या नगराध्यक्ष पदावर एकनाथ शिंदे यांच्या शिवसेनेने दावा केला आहे. महायुतीती जागावाटपाचा अद्याप फार्म्युलाच ठरलेला नसतानाच नगराध्यक्ष पदावर दावेदारी सुरू झाली आहे. यामुळे महायुतीत नगराध्यक्ष पदावरून वादाची ठिणगी पडण्याची शक्यता वर्तवली जातेय.

आगामी सावंतवाडी नगरपरिषद निवडणुकीच्या पार्श्वभूमीवर नगराध्यक्ष पदावर माजी मंत्री, आमदार दीपक केसरकर दावा केला आहे. त्यांनी, आमचा नगराध्यक्ष असावा, अशी आमची भूमिका आहे. महायुतीच्या बैठकीत हा विषय मांडणार असून महायुतीतून हे पद शिंदे शिवसेनेला सोडावे, अशी मागणी करणार असल्याचे त्यांनी सांगितले आहे.

सावंतवाडी ही एकमेव नगरपरिषद आहे. जिथे आरक्षण नसतानाही महिला नगराध्यक्षा राहिल्या आहेत. शिंदे शिवसेनेत अनेक सक्षम उमेदवार असून महायुतीमध्ये जागावाटपाची बोलणी सुरू आहे. माजी नगराध्यक्ष संजू परब हे शिंदे शिवसेनेसोबत आहेत. तसेच गेली अनेक वर्षे सावंतवाडी शहराचा पाठिंबा आम्हाला राहिला आहे. त्यामुळे नगराध्यक्ष पद शिंदे शिवसेनेकडेच राहावे, अशी आमची मागणी आहे, असेही केसरकर यांनी म्हटलं आहे.

तर या मागणीसाठी आपण आग्रही असून महायुतीच्या बैठकीत हा विषय मांडणार आहे. दरम्यान, महायुतीतून शिवसेनेला नगराध्यक्ष पद सोडावे, अशी भूमिका केसरकर यांची असल्याने आता महायुतीमध्ये नगराध्यक्ष पदासाठी काय निर्णय घेतला जातो? याकडे सर्वांचे लक्ष लागले आहे.

FAQs :

प्रश्न 1: सावंतवाडी नगराध्यक्षपदावर दीपक केसरकरांनी काय दावा केला आहे?
👉 त्यांनी सावंतवाडी नगराध्यक्षपदावर आपला पक्षाचा दावा मजबूत असल्याचं सांगितलं आहे.

प्रश्न 2: या दाव्यामुळे महायुतीत तणाव का निर्माण झाला?
👉 कारण नगराध्यक्षपदासाठी शिवसेना आणि भाजप या दोन्ही पक्षांतून दावे समोर येण्याची शक्यता आहे.

प्रश्न 3: सावंतवाडी नगराध्यक्षपद कोणत्या प्रवर्गासाठी राखीव आहे?
👉 सध्या ते महिलांसाठी राखीव असल्याचे जाहीर झाले आहे.

प्रश्न 4: या वादाचा राजकीय परिणाम काय होऊ शकतो?
👉 महायुतीतील अंतर्गत मतभेद तीव्र होऊ शकतात आणि उमेदवार निवड प्रक्रिया गुंतागुंतीची बनू शकते.

प्रश्न 5: दीपक केसरकर कोणत्या पक्षाचे आहेत?
👉 ते शिवसेना (एकनाथ शिंदे गट) चे आमदार आणि माजी मंत्री आहेत.