ZP Politics : तळकोकणात भाजपचा मास्टरस्ट्रोक! दिग्गजांना ‘धक्का’, चर्चेतले चेहरे बाहेर; नवीन नेतृत्वाची एंट्री

sindhudurg News : सिंधुदुर्ग जिल्हा परिषद अध्यक्ष आणि उपाध्यक्षपदाच्या निवडीत भाजपच्या वरिष्ठांनी ‘धक्कातंत्राचा’ वापर करत चर्चेत असलेल्या सर्व दिग्गज सदस्यांना डावलून भाजपच्या बांदा जिल्हा परिषद मतदारसंघाचे सदस्य प्रमोद कामत यांना अध्यक्षपदाची, तर उपाध्यक्षपदासाठी शिवसेनेचे पावशी मतदारसंघाचे सदस्य तुकाराम ऊर्फ दादा साईल यांना संधी दिली. या दोन्ही उमेदवारांविरोधात एकही अर्ज आला नसल्याने, ही निवड बिनविरोध झाल्याचे पीठासन अधिकाऱ्यांनी जाहीर केले. यामुळे तब्बल ३ वर्षे ३६० दिवसांनंतर जिल्हा परिषदेत पुन्हा लोकनियुक्त राजवट सुरू झाली आहे.

सिंधुदुर्ग जिल्हा परिषदेतील लोकनियुक्त प्रशासनाची मुदत २० मार्च २०२२ ला संपली होती. २१ मार्च २०२२ पासून जिल्हा परिषदेवर प्रशासकीय राजवट लागू होती. जिल्हा परिषद पंचायत समितीसाठी ७ फेब्रुवारीला मतदान आणि ९ फेब्रुवारीला मतमोजणीची प्रक्रिया झाली. या निकालात भाजपचे २७, एका पुरस्कृत सदस्यासह शिंदे शिवसेनेचे १४, ठाकरे शिवसेनेचे ३ आणि ६ अपक्ष सदस्य निवडून आले होते. त्यामुळे महायुतीची सत्ता आणि बिनविरोध निवड होणार असल्याची चर्चा आधीपासूनच होती. जिल्हाधिकारी तृप्ती धोडमिसे यांच्या आदेशानुसार आज अप्पर जिल्हाधिकारी शुभांगी साठे यांच्या अध्यक्षतेखाली निवडणूक प्रक्रिया झाली.

अध्यक्ष आणि उपाध्यक्षपदासाठी सकाळी ११ ते दुपारी १ वाजेपर्यंत अर्ज दाखल करण्याची वेळ होती. दुपारी १२ वाजलेच्या सुमारास भाजप आणि शिवसेनेचे नवनिर्वाचित सदस्य दाखल झाले. त्यांच्यासोबत कामत आणि साईल उपस्थित होते. यावेळी भाजप जिल्हाध्यक्ष प्रभाकर सावंत, शिवसेना जिल्हाप्रमुख दत्ता सामंत, जिल्हा बँक अध्यक्ष मनीष दळवी, शिवसेना उपनेते संजय आंग्रे, माजी अध्यक्ष काका कुडाळकर, संजय पडते यांसह महायुतीचे सर्व सदस्य आणि तालुका सभापती उपस्थित होते.

कामत यांच्या अर्जावर प्रमोद रावराणे, तर साईल यांच्या अर्जावर दीपलक्ष्मी पडते यांनी सूचक म्हणून स्वाक्षरी केली. दुपारी ३ वाजता छत्रपती शिवाजी महाराज सभागृहात नवनिर्वाचित सदस्यांची विशेष सभा झाली. पीठासन अधिकारी साठे यांनी दोन्ही पदांसाठी प्रत्येकी एकच अर्ज आल्याने ही निवड बिनविरोध झाल्याचे घोषित केले.

अध्यक्षपदासाठी भाजपकडे अनेक मातब्बर सदस्य शर्यतीत होते; मात्र सामाजिक बांधिलकी जपणारे आणि अत्यंत विनम्र व्यक्तिमत्त्व म्हणून ओळख असलेले बांदा मतदारसंघाचे सदस्य कामत यांनी कठीण काळातही खासदार नारायण राणे यांची साथ सोडली नव्हती. त्यांच्या या निष्ठेची दखल घेत राणे यांनी स्वतः कामत यांचे नाव निश्चित केले.

FAQs :

1. सिंधुदुर्ग ZP अध्यक्षपदी कोण निवडून आले?
प्रमोद कामत यांची अध्यक्षपदी निवड झाली.

2. उपाध्यक्षपदी कोण निवडले गेले?
तुकाराम उर्फ दादा साईल यांची उपाध्यक्षपदी निवड झाली.

3. ही निवडणूक कशी झाली?
कोणताही विरोधी अर्ज न आल्यामुळे निवड बिनविरोध झाली.

4. भाजपने कोणती रणनीती वापरली?
दिग्गजांना डावलून नवीन चेहऱ्यांना संधी देण्याची ‘धक्कातंत्र’ रणनीती वापरली.

5. या घटनेचे महत्त्व काय आहे?
जिल्हा परिषदेत जवळपास ४ वर्षांनंतर पुन्हा लोकनियुक्त सत्तेची स्थापना झाली.