Ladki Bahin Yojana : लाडक्या बहि‍णींना पैसे यायचे बंद झालेत... भाजप आमदाराने फडणवीस सरकारला विधानसभेतच उघड पाडलं

Ladki Bahin Yojana : लाडकी बहीण योजना सुरु झाल्यानंतरच्या दोन ते तीन महिन्यांतच या योजनेतील महिलांना पैसे येणे बंद झाले आहेत, असे म्हणत भाजप आमदार राम कदम यांनीच फडणवीस सरकारला उघडं पाडलं. विधानसभेमध्ये पॉईंट ऑफ इन्फोरमेशनवर राम कदम बोलत होते. दरम्यान, यावेळी राम कदम यांनी शिवसेना उद्धव बाळासाहेब ठाकरे पक्षाचे आमदार आदित्य ठाकरे यांच्यावरही टीका केली.

लाडकी बहीण योजना महायुतीसाठी गेमचेंजर ठरली. लोकसभा निवडणुकीत बसलेल्या सेटबॅकनंतर विधानसभा निवडणुकीत महायुती सरकारला पुन्हा घवघवीत यश मिळविण्यासाठी या योजनेची मोठी मदत झाली. पण विरोधकांकडून लाडक्या बहि‍णींना निवडणुकीपूर्वी केवळ अमिष दाखवल्याचा आरोप केला होता. निवडणुकीनंतर हे पैसे बंद होतील अशीही भीती महाविकास आघाडीच्या नेत्यांनी बोलून दाखवली होती.

विधानसभा निवडणूक संपताच ही भीती काही अंशी खरीही ठरली. सरकारने निवडणुकीनंतर लाडक्या बहीण योजनेतील महिलांची पडताळणी सुरू केली. यात लाखो बहि‍णींना आतापर्यंत बाद ठरविण्यात आले आहे. अशात आता योजना सुरु झाल्यानंतरच्या दोन ते तीन महिन्यांतच या योजनेतील महिलांना पैसे येणे बंद झाले आहेत, असे म्हणत भाजप आमदार राम कदम यांनीच फडणवीस सरकारला उघडं पाडलं.

माझ्या मतदारसंघातील काही महिलांनी आपल्याला पैसे येत नसल्याची तक्रार केली. त्यांचे आधार कार्ड बँक अकाऊंटला लिंक आहे, तरीही पैसे येत नाहीत. हे पैसे का येत नाहीत? हे समजण्यासाठी कोणताही मार्ग नाही. त्यामुळे एखादे अॅप किंवा सॉफ्टवेअर डेव्हलप करण्यात यावे. इथे नाव टाकल्यानंतर आपल्याला पैसे येणार आहेत की नाही हे कळून येऊ शकेल, अशी मागणीही कदम यांनी केली.

आमदार राम कदम प्रश्न विचारत असतानाच विरोधी बाकांवर या प्रश्नाबद्दल चर्चा सुरु झाली. हीच चर्चा ऐकून राम कदम यांनी महाविकास आघाडी आणि शिवसेना उद्धव बाळासाहेब ठाकरे पक्षावरही टीका केली. लाडक्या बहि‍णींना आम्ही पैसे दिले. तुम्ही दिले नाहीत. त्यामुळे तुम्हाला या योजनेवर बोलण्याचा अधिकार नाही. आदित्य ठाकरे तुम्हाला तर काहीच अधिकार नाही. मुंबई महापालिका तुम्ही लुटून खाली, असे म्हणत कदम यांनी टीका केली.