Maharashtra Cabinet Expansion : भाजप, राष्ट्रवादीकडून नव्या चेहऱ्यांवर विश्वास, मंत्रि‍पदाची घेणार शपथ!

Maharashtra Cabinet Expansion : भाजप, राष्ट्रवादी काँग्रेस,शिवसेनेकडून आत्तापर्यंत 38 जणांना मंत्रि‍पदासाठी फोन गेला आहे. आज (रविवारी) सायंकाळी चार वाजता मंत्रि‍पदाचा शपथविधी सोहळा नागपूरमध्ये पार पडणार आहे. तर, सोमवारपासून लगेच हिवाळी अधिवेशनाला सुरूवात होईल. विशेष म्हणजे एकनाथ शिंदे यांच्या मंत्रिमंडळात असलेल्या अनेक मंत्र्यांचा पत्ता कट झाला आहे. तीनही पक्षांकडून नवीन चेहऱ्यांना संधी देण्यात आली आहे.

मुख्यमंत्री देवेंद्र फडणवीस यांच्या मंत्रिमंडळात 50 टक्के मंत्री हे नवीन असणार आहेत. प्रादेशिक आणि जात समतोल राखत मंत्रिमंडळात नव्या चेहऱ्यांना संधी देण्यात आली आहे. भाजपकडून नितेश राणे, मेघना बोर्डीकर, शिवेंद्राराजे भोसले, जयकुमार गोरे, आकाश फुंडकर, आशिष शेलार हे मंत्रि‍पदाचे नवीन चेहरे असतील.

तर, एकनाथ शिंदेंच्या मंत्रिमंडळात स्थान न मिळालेल्या पंकजा मुंडे, गणेश नाईक, भाजपचे प्रदेशाध्यक्ष चंद्रशेखर बावनकुळे यांना देखील मंत्रि‍पदाची संधी मिळाली आहे.

शिवसेनेतील नवे चेहरे

शिवसेनेकडून एकनाथ शिंदे यांच्या शिवसेनेकडून संजय शिरसाट ,योगश कदम, आशिष जैस्वाल, भरत गोगावले, प्रकाश आबिटकर, प्रताप सरनाईक या नवीन चेहऱ्यांना संधी मिळाली आहे.

राष्ट्रवादीकडून कोण?

नरहरी झिरवाळ, मकरंद पाटील, इंद्रनील नाईक, या नव्या चेहऱ्यांना संधी देण्यात आली आहे. तर, एकनाथ शिंदे यांच्या मंत्रिमंडळात संधी न मिळालेल्या दत्तात्रेय भरणे यांना मुख्यमंत्री देवेंद्र फडणवीसांच्या मंत्रिमंडळात स्थान मिळाले आहे. भरणे यांना कॅबिनेट मंत्रिपद मिळण्याची शक्यता वर्तवण्यात येत आहे.