Parbhani NCP Politics : राष्ट्रवादीच्या गटनेत्यानेच धाडली नगरसवेकाला अपात्रतेची नोटीस! परभणीत पक्षातील अंतर्गत धुसफुस चव्हाट्यावर

Marathwada Politics News : राष्ट्रवादी काँग्रेसचे नगरसेवक अक्षय देशमुख यांच्याविरुध्द गटनेते विजय जामकर यांनी केलेल्या तक्रारीवरून विभागीय आयुक्त जितेंद्र पापळकर यांनी अपात्रतेची नोटीस बजावली. त्यावर 20 एप्रिल रोजी सुनावणी होणार आहे. यामुळे पक्षातील अंतर्गत धुसफुस पुन्हा चव्हाट्यावर आली आहे.

राष्ट्रवादी काँग्रेस पक्षाचे मनपातील गटनेते विजय जामकर यांनी छत्रपती संभाजीनगर विभागीय आयुक्त कार्यालयाकडे आपल्या विधिज्ज्ञामार्फत महाराष्ट्र स्थानिक सदस्य अनर्हता अभिनियम 1986 चे कलम 3 अन्वये अपील दाखल केले आहे. त्यावरून विभागीय आयुक्त पापळकर यांनी नगरसेवक अक्षय देशमुख यांना नोटीस पाठवली.

सोमवारी (ता.20) दुपारी दोन वाजता लेखी म्हणने व त्या पुष्ठ्यर्थ आवश्यक पुराव्यासह सुनावणीस उपस्थित राहण्याची सूचना यात करण्यात आली आहे. मनपात राष्ट्रवादी काँग्रेसचे 11 सदस्य असून महापौर, उपमहापौर पदाच्या निवडणुकीसाठी भाजप, राष्ट्रवादी काँग्रेस, जनसुराज्य पक्ष व यशवंत सेना या पक्षांत महायुती झाली होती. तर या निवडणूकीत शिवसेना उद्धव बाळासाहेब ठाकरे पक्ष व काँग्रेसने आघाडी केल्यामुळे त्यांचे संख्याबळ पुरेसे होते.

परंतु अक्षय देशमुख यांनी पक्षाचा व्हीप डावलून महापौर पदाच्या निवडणूकीत आघाडीच्या उमेदवाराला मतदान केले. तर उपमहापौरपदाच्या निवडणूकीत महायुतीच्या म्हणजे राष्ट्रवादी काँग्रेसच्या उमेदवाराला मतदान केल्याचा आरोप गटनेत्यांनी केला. पक्षातील शिस्त बिघडू नये म्हणून विभागीय आयुक्तांकडे आपले अपील दाखल केले होते. त्याची सुनावनी सोमवारी 20 रोजी होणार आहे.

FAQs :

1. अक्षय देशमुख यांना नोटीस का देण्यात आली?
विजय जामकर यांनी केलेल्या तक्रारीनंतर अपात्रतेची नोटीस देण्यात आली.

2. या प्रकरणाची सुनावणी कधी होणार आहे?
20 एप्रिल रोजी सुनावणी होणार आहे.

3. हा वाद कोणत्या पक्षात आहे?
हा वाद राष्ट्रवादी काँग्रेस पक्षात आहे.

4. या प्रकरणाचा परिणाम काय होऊ शकतो?
देशमुख यांच्या राजकीय कारकिर्दीवर परिणाम होऊ शकतो.

5. नोटीस कोणी बजावली?
विभागीय आयुक्त जितेंद्र पापळकर यांनी नोटीस बजावली.