Sharad Pawar News : शरद पवारांना बसणार मोठा धक्का; जवळचा नेता बांधणार हातात घड्याळ !

Mumbai News : राज्यात लवकरच स्थानिक स्वराज्य संस्थेच्या निवडणुका होत आहेत. त्यापूर्वीच राज्यातील राजकारणात मोठ्या घडामोडी घडताना दिसत आहेत. विधानसभा निवडणुकीत महायुतीने मोठे यश मिळवले. त्यानंतर महाविकास आघाडीतून मोठ्या प्रमाणात महायुतीकडे इनकमिंग होत आहे. त्यातच आगामी काळात होत असलेल्या निवडणुका डोळ्यासमोर ठेऊन मोठ्या प्रमाणात प्रवेश होत आहेत.

त्यातच आता राष्ट्रवादी काँग्रेस शरदचंद्र पवार पक्षाला मोठा धक्का बसण्याची शक्यता आहे. धाराशिव जिल्ह्यातील शरद पवार यांच्या जवळचा माजी आमदार असलेला नेता अजित पवार यांच्या राष्ट्रवादी काँग्रेसमध्ये लवकरच प्रवेश करणार आहे.

धाराशिव जिल्हा एकेकाळी शरद पवार (Sharad pawar) यांचा बालेकिल्ला मानला जात होता. मात्र, या ठिकाणी आता राष्ट्रवादी काँग्रेसमध्ये फूट पडल्यापासून मोठ्या प्रमाणात गळती लागली आहे. नुकत्याच झालेल्या विधानसभा निवडणुकीत महाविकास आघाडीला पराभव स्वीकारावा लागला होता. त्यामुळे धक्क्यावर धक्के बसत आहेत. महाविकास आघाडीमधील उद्धव ठाकरे यांच्या शिवसेनेला मोठ्या प्रमाणात गळती लागली असताना आता काँग्रेस आणि राष्ट्रवादी काँग्रेस शरद पवार पक्षातून काही नेत्यांनी महायुतीमध्ये प्रवेश केला आहे.

त्यातच आता धाराशिव जिल्ह्यातील शरद पवारांच्या राष्ट्रवादीचे माजी आमदार राहुल मोटे लवकरच अजित पवार (Ajit pawar) यांच्या राष्ट्रवादी काँग्रेसमध्ये प्रवेश करणार आहेत. त्याची सध्या भूम-परंडा मतदारसंघामध्ये चर्चा सुरू झाली आहे. नुकतीच मोटे यांनी मतदारसंघातील कार्यकर्त्यांची बैठक घेतली होती. त्यानंतर राहुल मोटे येत्या पाच ऑगस्टला राष्ट्रवादी काँग्रेस अजित पवार गटात प्रवेश करण्याची शक्यता आहे.

उपमुख्यमंत्री अजित पवारांच्या उपस्थितीत त्यांचा राष्ट्रवादीमध्ये प्रवेश होणार आहे. गेल्या काही दिवसापासून अजित पवार हे व्यस्त आहेत. त्यामुळे मोटे यांचा प्रवेश लांबल्याची माहिती सूत्रांने दिली. भूम, परंडा, वाशी मतदारसंघाचे माजी आमदार राहुल मोटे अजित पवार यांच्यासोबत जाणार असल्याने हा राष्ट्रवादी काँग्रेस शरद पवार पक्षासाठी मोठा धक्का असणार आहे.

दरम्यान, या संदर्भात भूम, परंडा आणि वाशी या तीन तालुक्यांमधील कार्यकर्त्यांसोबत बैठकीच्या माध्यमातून राहुल मोटे यांची पक्षप्रवेशाबाबत चाचपणी सुरू असल्याची माहिती समोर आली आहे. विधानसभेला शिवसेनेचे आमदार तानाजी सावंत यांच्या विरोधात माजी आमदार राहुल मोटे यांनी निवडणूक लढवली होती. केवळ दीड हजार मताच्या फरकाने मोटे यांना पराभव स्वीकारावा लागला होता. त्यानंतर आता लवकरच मोटे राष्ट्रवादी काँग्रेस अजित पवार गटात प्रवेश करण्याची शक्यता आहे. त्यामुळे आगामी काळात होत असलेल्या स्थानिक स्वराज्य संस्थेच्या निवडणुकीत या ठिकाणचे चित्र बदलणार आहे.