Chandrapur Politics : ऐन दिवाळीत शिंदेंच्या जिल्हाप्रमुखाला अटक! जिवतोडे यांच्या घरात घुसून पोलिसांची कारवाई; राजकीय वर्तुळात मोठी खळबळ

Chandrapur News : ऐन दिवाळीच्या सणात शिवसेना (शिंदे गट) पक्षाचे चंद्रपूर जिल्हाप्रमुख मुकेश जिवतोडे यांना घुग्घुस पोलिसांनी त्यांच्या राहत्या घरातून ताब्यात घेतले. त्यानंतर त्यांना अटक करण्यात आल्याची माहिती समोर आली आहे. आमदार बच्चू कडू यांच्या नेतृत्वाखाली काही दिवसांपूर्वी झालेल्या त्रिशूल आंदोलन प्रकरणी ही कारवाई करण्यात आली आहे. सणासुदीच्या काळात राजकीय पक्षाच्या जिल्हाप्रमुखावर झालेल्या या कारवाईमुळे चंद्रपूरच्या राजकीय वर्तुळात मोठी खळबळ उडाली आहे.

वेकोली (WCL) प्रशासनाविरोधात स्थानिक बेरोजगार, शेतकरी आणि प्रकल्पग्रस्तांच्या विविध मागण्यांसाठी बच्चू कडू यांच्या नेतृत्वाखाली त्रिशूल आंदोलन करण्यात आले होते. या आंदोलनाशी संबंधित प्रकरणाच्या तपासादरम्यान आवाजाचे नमुने देण्यासाठी मुकेश जिवतोडे यांना पोलिसांसमोर उपस्थित राहण्याची सूचना करण्यात आली होती.

मात्र, दिवाळीचा सण असल्याने तसेच आपण मुंबईत असल्यामुळे दिवाळीनंतर पोलिसांसमोर हजर राहण्याची मुभा द्यावी, अशी विनंती जिवतोडे यांनी केली होती. असे असतानाही पोलिसांनी ऐन दिवाळीच्या दिवशी त्यांच्या घरी जाऊन त्यांना ताब्यात घेतले. या कारवाईमुळे त्यांच्या समर्थकांमध्ये नाराजी व्यक्त होत आहे.

'प्रशासनाकडून सत्तेचा गैरवापर'

या कारवाईनंतर मुकेश जिवतोडे यांनी पोलिस प्रशासनाच्या कार्यपद्धतीवर प्रश्नचिन्ह उपस्थित केले. प्रशासन राजकीय दबावाखाली काम करत असल्याचा आरोपही त्यांनी केला. "आम्ही सत्तेत असलो तरी प्रशासनाकडून सत्तेचा गैरवापर केला जात आहे," असे म्हणत त्यांनी या कारवाईबद्दल नाराजी व्यक्त केली.

'दिवाळीत घरात लहान मुले, नातेवाईक असताना कारवाई'

दिवाळीच्या सणात पोलिसांनी घरी येऊन केलेल्या कारवाईमुळे कुटुंबीयांना मानसिक त्रास सहन करावा लागत असल्याचे जिवतोडे यांनी सांगितले. ते म्हणाले, "दिवाळीचा सण सुरू आहे. घरी लहान मुले आणि नातेवाईक आलेले असताना पोलिसांनी अशा पद्धतीने घरी येऊन कारवाई करणे चुकीचे आहे. त्यामुळे संपूर्ण कुटुंब मानसिक दबावाखाली येते."

तसेच, आपल्यावर खंडणी किंवा मारहाणीचा कोणताही गुन्हा दाखल नसल्याचा दावा त्यांनी केला. सर्वसामान्य जनतेला न्याय मिळवून देण्यासाठी आणि बेरोजगारांना रोजगार मिळावा, यासाठीच आपण आंदोलनात सहभागी झालो होतो, असेही त्यांनी स्पष्ट केले.

नोटिशीतील उल्लेखांवरही जिवतोडेंचा आक्षेप

यापूर्वी पोलिसांकडून पाठवण्यात आलेल्या नोटिशीबाबतही मुकेश जिवतोडे यांनी आक्षेप नोंदवला. नोटिशीत महिलांशी संबंधित तसेच दारू विक्रीचे गुन्हे दाखवून आपल्या कुटुंबाला मानसिक त्रास देण्याचा प्रयत्न होत असल्याचा आरोप त्यांनी केला. या प्रकरणांशी आपला कोणताही संबंध नसल्याचेही त्यांनी सांगितले.

दरम्यान, त्रिशूल आंदोलन प्रकरणातील कारवाईमुळे चंद्रपूर जिल्ह्यातील राजकीय वातावरण तापण्याची शक्यता आहे. विशेष म्हणजे, सत्ताधारी आघाडीतीलच एका घटक पक्षाच्या जिल्हाप्रमुखावर झालेल्या या कारवाईमुळे राजकीय वर्तुळात चर्चांना उधाण आले आहे. आता या प्रकरणावर शिवसेना (शिंदे गट) आणि प्रशासनाकडून काय भूमिका घेतली जाते, याकडे सर्वांचे लक्ष लागले आहे.