Chandrapur BJP News: महापालिका निवडणूक जाहीर होण्यापूर्वीच मुनगंटीवार-जोरगेवार समर्थकांमध्ये पुन्हा जुंपली!

Nagpur News: सध्या नगरपालिका आणि नगर पंचायती निवडणुकीमुळे सर्वत्र गोंधळ सुरू आहे. तो अद्याप निस्तरायचा आहे. त्यातच महापालिकेची निवडणूक जाहीर व्हायची असताना मुलाखती कोणी घ्यायच्या आणि अर्ज कोणी वाटप करायचे यावरून चंद्रपूरमध्ये भाजपच्या दोन नेत्यांच्या समर्थकांमध्ये वादाला सुरुवात झाली आहे.

भाजपचे ज्येष्ठ नेते व माजी मंत्री सुधीर मुनगंटीवार आणि भाजपचे आमदार तसेच निवडणूक प्रमुख किशोर जोरगेवार यांच्यामार्फत आपल्या आपल्या कार्यालयातून इच्छुकांना अर्ज नेण्याचे आवाहन करण्यात आले आहे. यामुळे कार्यकर्ते संभ्रमात पडले आहे. कुठल्या नेत्यांच्या कार्यालयातून अर्ज नेल्यास उमेदवारी मिळेल, असा पेच त्यांच्या समोर निर्माण झाला आहे.

आमदार जोरगेवार भाजपात आल्यापासून पक्षात मोठे मतभेद उफाळून आले आहेत. मुनगंटीवार विरुद्ध जोरगेवार असे उभे गट चंद्रपूर जिल्ह्यात पडले आहे. यातच पक्षाने मुनगंटीवारांना मंत्रिपद नाकारले. त्यांच्या विरोधात जाऊन जोरगेवार यांना पक्षात घेतले आणि उमेदवारी दिली. भाजपची शहर कार्यकारिणीत जोरगेवारांच्या हातात दिली. एवढेच नव्हे तर चंद्रपूर महापालिका निवडणुकीचे प्रमुख म्हणून जोरगेवार यांची नियुक्ती केली आहे.

त्यामुळे मुनगंटीवार यांचे कार्यकर्ते चांगलेच चिडले आहेत. सुधीर भाऊंना मुद्दाम डावलले जात आहे, त्यांचे खच्चीकरण केले जात आहे, असा सर्वांचा समज आहे. त्यावरून दिवसेंदिवस वातावरण खराब होत चालले आहे. जिल्हाध्यक्ष आणि शहराध्यक्ष निवडतानाही चंद्रपूर जिल्ह्यात आणि या दोन नेत्यांमध्ये मोठा वाद निर्माण झाला होता.

शेवटी ग्रामीणचा अध्यक्ष सुधीरभाऊ तर शहरात जोरगेवार यांच्या समर्थकांना करण्यात आले. मात्र यावरून वाद मिटण्याऐवजी अधिकच वाढत चालला आहे. चंद्रपूर महापालिकेत भाजपची सत्ता होती. त्यावेळी सर्व सूत्र मुनगंटीवार यांच्या हाती होते. येथे सुधीरभाऊंचा शब्द अंतिम मानला जायचा. तेच उमेदवार ठरवायचे आणि निवडणुकीचे सूत्र त्यांच्याच हाती असताचे. आता भाजपने त्यांच्या अधिकात संकोच केला आहे. शहराची सर्वे जबाबादारी जोरगेवार यांच्याकडे सोपवण्यात आली आहे. त्यानुसार भाजपचे प्रदेशाध्यक्ष रवींद्र चव्हाण यांनी जोरगेवार गटाचे व भाजपचे शहराध्यक्ष सुहास कासनगोट्टावार यांना महापालिका निवडणूक लढणाऱ्या इच्छुकांकडून अर्ज मागण्यासाठी पत्र दिले आहे.

कासनगोट्टावर यांनी सर्व इच्छुकांना भाजपच्या कार्यालयातून अर्ज घेऊन जावे, असे आवाहन केले आहे. दुसरीकडे सुधीर मुनगंटीवार यांचे कट्टर समर्थक तसेच माजी शहराध्यक्ष राहुल पावडे यांनीसुद्धा भाऊंच्या कार्यालयातून अर्ज घ्या, असे आवाहन इच्छुकांना केले आहे. त्यांनी भाजपचे नेते व राज्याचे महसूलमंत्री चंद्रशेखर बावनकुळे यांनी तोंडी सांगितले असल्याचा दावा केला आहे. त्यावरून वादाला सुरुवात झाली आहे.

यावर कासनगोट्टावार म्हणाले, "पावडे हे नेहमीच दोन नेत्यांमध्ये भांडण लावण्याचा प्रयत्न करतात. माझ्याकडे अध्यक्षांचे अधिकृत पत्र आहे. भाजपच्या कार्यालयातून अर्ज नेण्यास आम्ही आवाहन केले आहे. ते कुणाचे खाजगी कार्यालयात नाही पक्षाचे आहे. मुनगंटीवार ज्येष्ठ नेते आहेत. त्यांचा आम्ही आदर करतो. आमचा त्यांच्याशी कुठलाच वाद नाही. फक्त पावडे हीच अडचण आहे. तेच नेहमी हस्तक्षेप करतात. वाद निर्माण करतात, असा आरोप शहर अध्यक्ष कासनगोट्टावार यांचा आहे.