BJP Politics : पुणे भाजपमध्ये होणार खांदेपालट, महापालिकेच्या पार्श्वभूमीवर नव्या शहराध्यक्षाची होणार नियुक्ती?

Pune News : आगामी स्थानिक स्वराज्य संस्थांच्या निवडणुकांच्या पार्श्वभूमीवर भाजपमध्ये संघटनात्मक बदलाचे वारे वाहताना पाहायला मिळत आहेत. संपूर्ण महाराष्ट्रात भाजपमध्ये संघटनात्मक बदल होणार असल्याचं सांगितलं जात आहे. याच पार्श्वभूमीवर आता पुण्यामध्ये देखील खांदेपालट होणार असून भाजपचा शहराध्यक्ष बदलणार असल्याचं चर्चा सुरू आहेत. महापालिका निवडणुकीच्या दृष्टिकोनातून पालिकेची संपूर्ण जान असणाऱ्या स्थानिक नेत्याची शहराध्यक्षपदी नियुक्ती केली जाणार असल्याचं बोल जातय.

विधानसभा निवडणुकीनंतर भाजपने आगामी स्थानिक स्वराज्य संस्थांच्या निवडणुकीसाठी संघटनात्मक बांधणीला सुरुवात केली आहे. या दृष्टिकोनातून सर्वप्रथम सभासद नोंदणी अभियान पक्षाकडून हाती घेण्यात आलं होतं. पुण्यात देखील आठ विधानसभा मतदारसंघांमध्ये मोठ्या प्रमाणात सभासद नोंदणी झाली असून 60 ते 70 हजार सभासद नोंदणी प्रत्येक मतदारसंघात करण्यात आली आहे. हे सभासद नोंदणी अभियान यशस्वी झाल्यानंतर आता भाजपकडून संघटनात्मक मायक्रो प्लॅनिंग करण्यात येत आहे. त्यानुसार पुढील महिना पंधरा दिवसांमध्ये प्रभाग अध्यक्ष पासून ते मंडल अध्यक्षापर्यंत नव्या नियुक्त केल्या जाणार असल्याचं सांगितलं जात आहे.

आता शंभर बूथ साठी एक मंडल अध्यक्ष

प्रत्येक विधानसभा मतदारसंघात पूर्वी भाजपकडून एका मंडल अध्यक्षाची नियुक्ती केली जात होती. मात्र आता 100 बूथ अध्यक्षांच्या मागे एक मंडल अध्यक्ष दिला जाणार आहे. त्यामुळे जी संघटनात्मक रचना ही एका विधानसभा मतदारसंघासाठी असायची ती संघटनात्मक रचना आता 100 बूथ साठी असणार आहे.

जाण असणाऱ्या नेत्याची लागणार वर्णी

या सगळ्या संघटनात्मक बदला दरम्यान पुण्यातील शहराध्यक्ष देखील बदलणार असल्याच्या चर्चा सुरू झाल्या आहेत. 19 जुलै 2023 मध्ये तत्कालीन शहराध्यक्ष जगदीश मुळीक यांच्या जागी धीरज घाटे यांची शहराध्यक्ष म्हणून नियुक्ती करण्यात आली होती. धीरज घाटे तब्बल दोन वर्ष शहराध्यक्ष पदावर विराजमान आहेत. मात्र आता त्यांच्या जागी नव्या नेत्याला संधी दिली जाणार असल्याचं बोललं जात आहे. आगामी महापालिका निवडणुकीच्या दृष्टिकोनातून महापालिकेची आणि स्थानिक राजकारणाची जाण असणाऱ्या नेत्याच्या गळ्यामध्ये ही शहराध्यक्ष पदाची माळ पडणार असल्याचं सांगितलं जात आहे.

चार नेत्यांची नावे चर्चेत

सध्या महापालिकेमध्ये विविध पद भूषवलेल्या चार नेत्यांची नावे शहराध्यक्ष पदासाठी चर्चेत आहेत. या नेत्यांकडून शहराध्यक्ष पदासाठी मोर्चे बांधणी सुरू असून काही बैठका देखील झाल्या असल्याचं सांगितलं जात आहे. त्यामुळे आगामी महिना पंधरा दिवसांमध्ये पुणे भाजपला नवीन शहराध्यक्ष मिळण्याची शक्यता नाकारता येत नाही. सध्या शहराध्यक्ष पदासाठी चर्चेत असलेल्या नावांपैकी कोणत्या नेत्याच्या गळ्यात ही शहराध्यक्ष पदाची माळ पडणार याकडे सर्वांच लक्ष राहणार आहे.