NCP Leader Viral Video : अजितदादांनी राष्ट्रवादीच्या ‘ज्या’ पदाधिकाऱ्याच्या फोनवरून महिला DYSPला धमकावले; त्याचा नशा करतानाचा व्हिडिओ व्हायरल

Solapur, 06 September : उपमुख्यमंत्री अजित पवार यांनी ज्याच्या फोनवरून महिला पोलिस अधिकाऱ्याला धमकावले. त्या राष्ट्रवादीच्या पदाधिकाऱ्याचा नशा करतानाच एक व्हिडिओ व्हायरल झाला आहे. त्यावरूनही उपमुख्यमंत्री पवार यांच्यावर प्रश्नांचा भडिमार केला जात आहे. एकंदरीतच माढ्यातील ‘त्या’ व्हिडिओवरून उपमुख्यमंत्री अजित पवार आणि राष्ट्रवादीला नामुष्कीला तोंड द्यावे लागत आहे.

माढा तालुक्यातील कुर्डू येथील मुरुम उपसाप्रकरणी करमाळा-माढ्याच्या परिविक्षाधिन उपविभागीय पोलिस अधिकारी अंजली कृष्णा यांनी कारवाई केली होती. त्यानंतर राष्ट्रवादी काँग्रेसचे (NCP) माढा-करमाळा विधानसभा मतदारसंघाचे अध्यक्ष बाबाराजे जगताप यांनी थेट उपमुख्यमंत्री अजित पवार यांना फोन लावला होता. त्या फोनवरून डीवायएसपी कृष्णा आणि अजित पवार यांच्यात चकमक झाली होती.

अजित पवार यांना संबंधित डीवायएसपीने मला ‘व्हॉटसअप’ कॉल करा, असे म्हटले होते. त्यानंतर चिडलेल्या अजित पवारांनी मी तुझ्यावर कारवाई करेन, असे धमकावले होते. त्यानंतर राज्यभरातून टीकेची झोड अजित पवार (Ajit Pawar) यांच्यावर उठली होती. त्या प्रकरणी अजित पवार यांनी आपल्या ट्विटरवरून जाहीररित्या खुलासा केला होता. मात्र, त्यासंबंधाने सुरू असलेले वादंग काही केल्या थांबायला तयार नाही.

राष्ट्रवादी काँग्रेस पक्षाच्या ज्या पदाधिकाऱ्याच्या मोबाईल फोनवरून अजित पवार यांनी महिला पोलिस अधिकारी अंजली कृष्णा यांना कारवाईची धमकी दिली होती. त्याच बाबाराजे जगताप यांचा नशा करतानाचा एक व्हिडिओ व्हायरल झाला आहे. तो व्हिडिओ अल्पावधीतच मोठ्या प्रमाणात व्हायरल झाला आहे. उपमुख्यमंत्री अजित पवार यांनी ‘याच्यासाठी पोलिस अधिकाऱ्याला कारवाईची धमकी दिली का’, असा सवाल सोशल माध्यमांतून विचारला जात आहे.

व्हिडिओमध्ये दिसणारा मी नाही : बाबाराजे जगताप

दरम्यान, व्हायरल व्हिडिओबाबत राष्ट्रवादी काँग्रेसचे माढा-करमाळा विधानसभा मतदारसंघाचे अध्यक्ष बाबाराजे जगताप म्हणाले, व्हायरल झालेल्या व्हिडिओमध्ये दिसणारा मी नाही. मी कुठेही सापडत नाही म्हणून कोणीतरी एआय तंत्रज्ञान वापरून हा व्हिडिओ तयार केलेला आहे. व्हिडिओमध्ये दिसणारा मी नाही, असा खुलासा जगताप यांनी केला आहे.