Pune Crime : पुण्यात कायदा सुव्यवस्थेचे तीन-तेरा; हॉटेल मालकावर पेट्रोल ओतले तो पळाला म्हणून त्याची गाडी जाळली

Pune News : पुण्यात सध्या कोयता गँगमध्ये नागरीक त्रस्त झाले असून घरांची तोडफोडीसह वाहणांची जाळपोळ या गँगकडून केली जातेय. यातच आता स्वारगेट सारखे बस स्थानक देखील महिलांसाठी सुरक्षित नसल्याचे समोर आले आहे. येथे मंगळवारी (ता.25) पहाटे पहाटे एका तरूणीवर बलात्कार झाल्याची घटना उडकीस आली आहे. यामुळे पुण्यात कायदा आणि व्यवस्था आहे की नाही असे सवाल आता विरोधकांसह सर्वसामान्य नागरीक विचारत आहेत. अशातच आता येथील भारती विद्यापीठ परिसरात गुंडांचा हैदोस घातल्याचे समोर आले आहे. येथे एका हॉटेल मालकाच्या अंगावर पेट्रोल टाकून जाळण्याचा प्रयत्न करण्यात आल्याने खळबळ उडाली आहे.

याबाबत मिळालेली माहिती अशी की, महाशिवरात्रीच्या पहाटेच कात्रज परिसरातील एका हॉटेलच्या बाहेर काही तरुणांमध्ये वाद झाला. हा वाद रात्रीच्या बाराच्या सुमारास झाला. या वादानंतर त्याच्यात जोरदार मारामारीत झाली. यामुळे हॉटेलसमोर होणारी हाणामारी थांबण्यासह येथे हाणामारी करू नका हे सांगण्यासाठी हॉटेल मालक अमित खैरे यांनी त्या तरुणांना आडवले.

(२५ वर्षे पूर्ण करणारा ई-सकाळ आता कॉमस्कोअरमध्ये नंबर १. डिजिटल माध्यमांच्या क्षेत्रातली नवी झेप)

तसेच आमच्या हॉटेल समोर भांडणे करू नका, असे म्हटल्याने त्या गुंडांनी अमित खैरे यांनाच मारहाण केली. त्या तरुणांनी हॉटेलचालकालाच सिमेंटचा ब्लॉक फेकून मारला. यात ते जखमी झाले. हा सगळा प्रकार भारती विद्यापीठ पोलीस ठाण्याच्या हद्दीत घडला आहे.

या प्रकरणानंतर अमित खैरे (वय:29 वर्षे, रा. आंबेगाव पठार ) यांनी यांनी भारती विद्यापीठ पोलीस ठाण्यात जाऊन तक्रार नोंदवली. याप्रकरणी गुन्हा दाखल करण्यात आला आहे. तक्रार दिल्यानंतर अमित खैरे उपचारासाठी रुग्णालयात जात असतानाच पुन्हा एकदा त्या गुंडांनी त्यांना आडवले. पुन्हा मारहान केली.

या गुंडांनी बाटलीतून आणलेले पेट्रोल त्यांच्या अंगावर टाकून त्यांना जिवंत जाळण्याचा प्रयत्न केला. मात्र यावेळी प्रसंगावधान दाखवत दुचाकी तेथेच टाकून अमित खैरे यांनी पळ काढला. पण गुन्हेगारी वृत्तीच्या तरूणांनी त्यांची दुचाकीच पेटवून दिली. सध्या या परिसर दहशतीचे वातावरण निर्माण झाले असून नागरिक भीतीच्या छायेत आहेत

किरकोळ गुन्हा दाखल

ही घटना सीसीटीव्हीमध्ये कैद झाली असून या तरूणांनी हॉटेल मालकाला जिवंत जाळण्याचा प्रयत्न केला. पण तो पळाल्याने त्यांनी त्याची गाडी जाळवी. हा प्रकार गंभीर असतानाही पोलिसांनी किरकोळ स्वरूपाचा गुन्हा दाखल केला आहे. तर पोलिसांनी 8 ते 10 अज्ञात व्यक्तीच्या विरोधात गुन्हा दाखल करून आपले सोपस्कार पाडल्याने आता संपात व्यक्त केला जातोय.

एकीकडे स्वारगेट बस स्थानकात एका तरूणीवर बलात्कार झाल्याची घटना ताजी असून याचा आरोपी अद्याप सापडलेला नाही. या प्रकरणावरून पुण्यासह राज्यात संपात व्यक्त केला जातोय. अशातच आता पोलिस चौकीच्या हाकेच्या अंतरावर हॉटेल मालकाला मारहान झाल्याने परिसरात मोठी खळबळ उडाली असून नागरिकांमध्ये भीतीचे वातावरण निर्माण झाले आहे.