Phaltan Doctor Case : CM फडणवीसांच्या फलटण दौऱ्यापूर्वी मोठी घडामोड; डॉक्टर युवतीच्या 'सुसाईड नोट'मध्ये नाव असलेला PSI बदने 'सरेंडर'

Phaltan News: सातारा जिल्ह्यातील फलटण उपजिल्हा रुग्णालयात वैद्यकीय अधिकारी म्हणून ड्युटीवर असलेल्या डॉक्टर तरुणीच्या आत्महत्या प्रकरणानं संपूर्ण महाराष्ट्र खळबळ उडाली आहे. या प्रकरणात दिवसेंदिवस अनेक धक्कादायक खुलासे समोर येत आहे. अशात आता मुख्यमंत्री देवेंद्र फडणवीस यांच्या फलटण दौऱ्यापूर्वी डॉक्टर युवतीने सुसाईड नोटमध्ये अत्याचाराचा आरोप केलेला PSI गोपाल बदने शनिवार रात्री उशीरा स्वतःहून फलटण शहर पोलीस ठाण्यात हजर झाला. पोलिसांनी त्याला तातडीने अटक केली असून पुढील तपास सुरु आहे.

फलटण शहरातील एका नामांकित हॉटेलमध्ये मेडिकल ऑफिसर महिला डॉक्टरबाबत काही धक्कादायक खुलासे समोर येत आहेत. फलटण उपजिल्हा रुग्णालयातील महिला डॉक्टरने भाऊबीजेच्या दिवशी आत्महत्या केली असून,तिने हातावर लिहिलेल्या सुसाईड नोटमध्ये पीएसआय गोपाळ बदने व घरमालक प्रशांत बनकर यांच्यावर आरोप केले आहेत.

सुसाईड नोटनुसार,गोपाळ बदनेने तिच्यावर चारवेळा बलात्कार केल्याचे नमूद केले असून,पोलिसांनी प्रशांत बनकरला अटक केली आहे,तर गोपाळ बदने फरार दोन दिवसांपासून फरार होता. बदनेचे शेवटचे मोबाईल लोकेशन पंढरपुरात आढळल्याने पोलिसांनी पंढरपूर व बीड जिल्ह्यात शोध मोहीम सुरू केली होती.

या सुसाईड नोटच्या आधारे पोलिसांनी संशयित आरोपी प्रशांत बनकर याला अटक केली आहे. त्याला कोर्टात हजर करण्यात आले होते. त्याला 4 दिवसांची पोलिस कोठडी सुनावण्यात आली आहे. याचदरम्यान,सहायक पोलिस निरीक्षक गोपाल बदने फरार होता. त्यामुळे पोलिसांवरचा दबाव वाढतच चालला होता. त्याच्या शोधासाठी पोलिसांची पाच पथके तपास करत होती.

शनिवारी रात्री पीएसआय गोपाल बदने स्वत:हून फलटण शहर पोलिस ठाण्यात हजर झाला. यानंतर पोलिसांनी त्याचा जबाब नोंदवला असून त्याची वैद्यकीय चाचणी करण्यात येणार असल्याची माहिती समोर येत आहे. त्याला न्यायालयात हजर करण्याची शक्यता आहे. बदने सरेंडर केल्यामुळे डॉक्टर तरुणीच्या आत्महत्येप्रकरणी पोलिस तपासात मोठे धागेदोरे समोर येण्याची शक्यता आहे.