Kolhapur News: कोल्हापूर महापालिकेत काँग्रेस दुबळा नाही; महायुतीसाठी सतेज पाटील डोकेदुखी ठरणार

Kolhapur News : काँग्रेसमधून शिवसेनेत गेल्यामुळे आणि जिल्ह्यात काँग्रेसची झालेल्या पिछेहाटमुळे कोल्हापूर महानगरपालिकेत सध्या काँग्रेस एकाकी पडल्याचे चित्र असले तरी महायुतीसमोर आव्हानांचा डोंगर आहे.

महायुतीमधील राष्ट्रवादी, शिवसेना आणि भाजपमध्ये झालेली भाऊगर्दी पाहता त्याचा सर्वाधिक फायदा काँग्रेसला होणार असल्याचे सध्यातरी चित्र आहे. 2015 च्या महापालिका निवडणुकीत काँग्रेसने युतीची सत्ता असताना मिळवलेले यश पाहता महायुतीसमोर केवळ काँग्रेस नेते आमदार सतेज पाटील (Satej Patil) हीच डोकेदुखी असणार आहे.

सध्या कोल्हापूर (Kolhapur) महानगरपालिकेची निवडणूक ही सर्वच राजकीय पक्षांकडून महाविकास आघाडी आणि महायुती म्हणून लढवण्याची तयारी केली जात आहे. मात्र ज्या पद्धतीने लोकसभा आणि विधानसभा निवडणुक शक्य आहे. त्या पद्धतीने स्थानिक स्वराज्य संस्थेच्या निवडणुकीत एकत्रपणे निवडणूक लढवणे हे स्थानिक पातळीवर अशक्य आहे.

यंदाची निवडणूक ही चार सदस्य पद्धतीने होणार असल्याने इच्छुकांची भाऊगर्दी वाढली आहे. सत्ताधारी पक्षांकडे ओढा वाढल्याने प्रत्यक्षात निवडणुकीवेळी अनेकांची नाराजी असणार आहे. अशा नाराजांवर काँग्रेस लक्ष ठेवून आहे.

महायुतीकडून निवडून येण्याची क्षमता असणाऱ्या उमेदवारांना सोबत घेतले जात आहे. भाजप शिवसेना आणि राष्ट्रवादीकडून तसे उमेदवार शोधले जात आहेत. त्यामुळे निवडणुकीवेळी जागावाटप करताना महायुतीत अंतर्गत राजकारण होण्याची शक्यता आहे. याउलट महाविकास आघाडीत शिवसेना उद्धव बाळासाहेब ठाकरे, राष्ट्रवादी शरदचंद्र पवार पक्ष, आणि काँग्रेस आहे. काँग्रेस वगळता इतर दोन्ही पक्षाची अवस्था बिकट आहे.

अशा परिस्थितीत काँग्रेसला सर्वाधिक जागा मिळवून घेण्याचा प्रयत्न काँग्रेस नेते आमदार सतेज पाटील यांचा असणार आहे. काँग्रेसकडे अनुभवी आणि मुरब्बी उमेदवारांची फौज आहे. गरज पडल्यास उमेदवारांची अदलाबदल देखील काँग्रेस करू शकते. त्याचा फायदा अधिक होऊ शकतो याची जाणीव आमदार सतेज पाटील यांना देखील आहे.