Solapur, 21 June : प्रसिद्ध मेंदूविकार तज्ज्ञ डॉ. शिरीष वळसंगकर यांच्या आत्महत्येप्रकरणी पोलिसांनी तब्बल 720 पानांचे दोषारोपपत्र कोर्टात दाखल केले आहे. मात्र, त्यात काही महत्वपूर्ण बाबींचा समावेश नसल्याचे सांगण्यात येत आहे. तसेच, आत्महत्येपूर्वी डॉक्टरांनी मराठीतून चिठ्ठी लिहिली होती. तत्पूर्वी त्यांनी 2001 मध्ये रुग्णांच्या नातेवाईकाला समाजावे म्हणून मराठीतून डिस्क्रिप्शन लिहून दिले होते, त्यानंतर तब्बल 24 वर्षांनंतर म्हणजे आत्महत्येपूर्वी डॉ. वळसंगकर यांनी मनीषा मुसळे माने हिच्या नावाचा उल्लेख असलेली सुसाईड नोट लिहिल्याचे पोलिस तपासात निष्पन्न झाले आहे.
डॉ. शिरीष वळसंगकर (Dr. Shirish Valsangkar) यांच्या आत्महत्येला 63 दिवस झाले आहेत. डॉक्टरांच्या आत्महत्येप्रकरणी हॉस्पिटलची प्रशासकीय अधिकारी मनीषा मुसळे माने हिला अटक करण्यात आले होते. ती गेली 62 दिवसांपासून अटकेत आहे. अटकेतील मनीषा मुसळे-माने हिच्या जामिनावर आज (ता. 21 जून) न्यायालयात सुनावणी होणार आहे.
दरम्यान, डॉक्टरांच्या खिशात सुसाईड नोट (suicide note) मिळाली होती, त्यात मनीषा मुसळे माने हिच्या त्रासामुळे आपण आत्महत्येसारखे टोकाचे पाऊल उचलत असल्याचे म्हटले होते. ती चिठ्ठी डॉक्टरांनी मराठीतून लिहिली हेाती. तत्पूर्वी वळसंगकर यांनी 2001 मध्ये रुग्णाच्या तब्येतीबद्दल नातेवाइकाला समजावे म्हणून मराठीतून डिस्क्रिप्शन लिहिले होते.
त्यापूर्वी डॉक्टर वळसंगकर यांनी मुलगा डॉ अश्विन यांना मराठीतून एक पत्र लिहिले होते. तसेच, डॉ. उमा वळसंगकर यांना डॉ. शिरीष वळसंगकर यांनी 1985 मध्ये काही पत्रं मराठीतून लिहिलेली होती. या पत्रांचा दस्तऐवज डॉ. वळसंगकरांच्या सुसाईड नोटमधील अक्षरे ओळखण्यासाठी पोलिसांनी हस्ताक्षर तज्ज्ञांकडे पाठविली होती.
हस्ताक्षर तज्ज्ञांनी पोलिसांकडे दैनंदिन अथवा नजीकच्या काळातील आठ ते दहा कागदपत्रांच्या नमुन्यांची मागणी केली हेाती. पण डॉक्टरांनी अलीकडच्या काळात मराठीतून लिहिलेली कागदपत्रे उपलब्ध नसल्याचे पोलिसांनी हस्ताक्षर तज्ज्ञांना कळविले आहे. डॉ. शिरीष वळसंगकर यांनी अलिकडच्या काळात मराठीत लिहिलेली कागदपत्रे उपलब्ध नसल्याचे डॉ. अश्विन यांनी पोलिसांना सांगितले आहे.
दरम्यान, दोषारोपपत्रात डॉक्टरांच्या घरातील घटनेच्या दिवशीचे सीसीटीव्ही फुटेज, डॉक्टरांच्या मोबाईलचे सीडीआर, तसेच रुग्णालयातील 18 एप्रिलचे सीसीटीव्ही फुटेज, गोळी झाडून घेतल्यानंतर वळसंगकर रक्ताच्या थारोळ्यात पडल्यानंतर त्या ठिकाणी पहिल्यांदा आलेला घराशेजारील दर्बी क्लॉथ सेंटरमधील सुरक्षारक्षकाचा जबाब, या गोष्टी पोलिसांनी दाखल केलेल्या दोषारोपपत्रात नाहीत.
दोषारोपपत्रातील 720 पानांपैकी 300 पाने मनीषा मुसळे मानेवर
डॉ. शिरीष वळसंगकर यांच्या आत्महत्येप्रकरणी दाखल करण्यात आलेल्या 720 पानांच्या दोषारोपपत्रात तब्बल 300 हून अधिक पाने ही मनीषा हिचे गेल्या तीन वर्षांमधील बॅंकांमधील व्यवहार, तसेच, दागिने खरेदीची आहेत. याशिवाय, डॉ. वळसंगकर यांच्या पत्नी डॉ. उमा, मुलगा डॉ. अश्विन, सून डॉ. शोनाली यांच्यासह रुग्णालयातील कर्मचाऱ्यांचे जबाब यासाठीची 100 पाने आहेत.
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.