Solapur, 29 May : विख्यात मेंदूविकार तज्ज्ञ डॉ. शिरीष वळसंगकर यांच्या आत्महत्येला वळसंगकर यांच्या रुग्णालयाची प्रशासकीय अधिकारी मनीषा मुसळे माने हीच जबाबदार आहे, या निष्कर्षांपर्यंत पोलिस आले आहेत. तिच्या विरोधात पोलिस चार्जशीट दाखल करण्याच्या तयारीत आहेत. दरम्यान, मुसळे माने हिला ई-मेल संदर्भात जाब विचारण्यासाठी रुग्णालयात बोलविण्यात आले होते. त्यावेळी तिने डॉक्टरांची पत्नी उमा, मुलगा डॉ. अश्विन यांच्यासमोर तिने कामावरून काढणार नसाल तर तरच माफीनामा देते, अशी अट घातली होती, असेही पोलिस सूत्रांनी सांगितले.
डॉ. शिरीष वळसंगकर (Dr. Shirish Valsangkar) यांनी 18 एप्रिल रोजी गोळी झाडून घेऊन घरातील बाथरूममध्ये आत्महत्या केली होती. त्यानंतर 19 एप्रिल रोजी डॉक्टरांच्या खिशात सापडलेल्या चिठ्ठीच्या आधारे वळसंगकर हॉस्पिटलची प्रशासकीय अधिकारी मनीषा मुसळे माने हिला अटक करण्यात आले होते. त्यानंतर पोलिसांनी तिच्यावर तपासाचा रोख ठेवला होता. तपासांती पोलिस डॉक्टरांच्या आत्महत्येप्रकरणी मनीषा मुसळे माने हीच जबाबदार असल्याच्या निष्कर्षापर्यंत आले आहेत.
मनीषा मुसळे माने (Manisha Musale Mane) हिच्यावर दोषारोपपत्र (चार्जशीट) न्यायालयात दाखल करण्याची तयारी पोलिसांनी सुरू केली आहे. न्यायाधीशांसमोर पोलियांनी त्यासाठी सात जणांचे जबाब नोंदविले आहेत. या सातही जणांनी डॉ. वळसंगकर यांच्या आत्महत्येला मनीषा मुसळे माने हीच जबाबदार आहे, असा जबाब दिला आहे. त्या आधारे पोलिसांनी न्यायालयात 20 जूनपूर्वी चार्जशीट दाखल करण्यात येणार असल्याची माहिती पोलिस सूत्रांनी दिली आहे.
वळसंगकर हॉस्पिटलचे प्रशासकीय अधिकार मनीषा मुसळे माने हिच्याकडे होते. त्या अधिकाराचा गैरफायदा घेऊन तिने हॉस्पिटलमध्ये मोठ्या प्रमाणात आर्थिक अफरातफर केली आहे, असा पोलिसांचा दावा आहे. तपासात मुसळे माने हिच्या तीन बॅंक खात्यात तिच्या उत्पन्नापेक्षा सुमारे 39 लाख रुपये जादा जमा झाल्याचे दिसून आले. त्यामुळेच डॉ. वळसंगकर यांची पत्नी डॉ. उमा, मुलगा डॉ. अश्विन, सून डॉ. शोनाली व अन्य चौघांचे जबाब न्यायाधीशांसमोर नोंदविण्यात आले आहेत.
मनीषा मुसळे माने हिच्या हॉस्पिटलमधील अधिकार कमी केल्यानंतर तिने दोन्ही मुलांना मारून आपण जाळून घेऊन आत्महत्या करणार आहोत, त्यास डॉ शिरीष वळसंगकर आणि कुटुंबीय जबाबदार असतील, असा ई मेल केला होता. त्यानंतर मुसळे माने हिला त्याबाबतचा जाब विचारण्यासाठी डॉ. शिरीष, त्यांची पत्नी डॉ. उमा व मुलगा डॉ. अश्विन यांच्यासमोर रुग्णालयात बोलावून घेण्यात आले होते.
त्यावेळी मनीषा मुसळे माने हिने माफीनामा देण्याची तयारी दर्शविली होती. मात्र, त्यासाठी अट ठेवली होती. ‘मला कामावरून काढणार नसाल, तरच मी माफीनामा देते’ अशी ती अट होती. त्या वेळी वळसंगकर यांनी मनीषाला ‘ही अट कशासाठी’ असा सवाल केला होता. मात्र, डॉक्टरांच्या हाती माफीनामा ठेवून मनीषा तेथून रागाने निघून गेली होती, असे त्या ठिकाणी उपस्थित असलेल्यांनी जबाबत सांगितले
अटकेत असलेल्या मनीषा मुसळे माने हिची न्यायालयीन कोठडी मंगळवारी (ता. 27 मे) संपली आहे. त्यानंतर तिला पुन्हा न्यायालयात हजर करण्यात आले. पोलिसांनी अधिक तपासाचे कारण सांगून पुन्हा 14 दिवसांची न्यायालयीन कोठडी वाढवून घेतली आहे. याही वेळी त्यांनी पोलिस कोठडीचे अधिकार राखून ठेवले आहेत. दरम्यान, सरकारी पक्षाने मनीषाच्या जामीन अर्जावरील म्हणणे सादर केल्याने तिच्या जामीन अर्जावर आता 09 जूनला सुनावणीला होण्याची शक्यता आहे.
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.