Solapur, 19 May : डॉ. शिरीष वळसंगकर यांच्या आत्महत्येला 18 मे रोजी एक महिना पूर्ण झाला. पण, डॉक्टरांच्या आत्महत्येचे ठोस कारण अजूनही पोलिसांना मिळालेले नाही. पोलिसांचा तपास मनीषा मुसळे माने हिच्या पुढे जायला तयार नाही. दुसरीकडे, गृहकलहाचा मुद्दा डॉक्टरांचे निकटवर्तीय वारंवार मांडत असताना पोलिसांनी त्या दिशेने तपास केला की नाही, हे अद्याप समोर येऊ शकलेले नाही. गृहकलहामागे डॉक्टरांची सून डॉ शोनाली वळसंगकर असल्याचे निकटवर्तीय खासगीत सांगतात. तसेच, हॉस्पिटलमधून डॉ शोनाली यांना हद्दपार करण्यात आले आहे, ही घटना गृहकलह असल्याचे दर्शवित नाही का, असा मुद्दा उपस्थित केला जात आहे.
विख्यात मेंदूविकार तज्ज्ञ डॉ. शिरीष वळसंगकर (Dr. Shirish Valsangkar) यांनी 18 एप्रिल रोजी राहत्या घरातील बाथरूमध्ये गोळ्या झाडून आत्हत्या केली होती. त्यानंतर दुसऱ्या दिवशी डॉक्टरांच्या पॅन्टच्या खिशात आढलेल्या सुसाईट नोटच्या आधारे वळसंगकर हॉस्पिटलची प्रशासकीय अधिकारी मनीषा मुसळे माने हिला अटक करण्यात आले. मात्र, रक्ताच्या थारोळ्यात पडलेल्या डॉ शिरीष वळसंगकर यांना त्यांच्या स्वतःच्या रुग्णालयात उपचारासाठी नेले होते. त्या वेळी कपडे फाडून त्यांच्यावर उपचार करण्यात आले होते. त्या दिवशी खुद्द पोलिस आयुक्तांनी सुसाईड नोट सापडली नसल्याचे म्हटले होते.
सुसाईड नोटवरील डॉक्टरांची स्वाक्षरी ही मराठीत असून ती फक्त डॉ शिरीष अशी होती. तसेच डॉक्टरांनी बाथरूममध्ये आत्महत्या केली होती. पण पिस्तूल बेडरूममध्ये सापडले होते, त्यामुळे सुसाईड नोट आणि पिस्तूलबाबत प्रश्न उपस्थित होत आहेत. पण पोलिसांचा तपास मनीषा मुसळे माने (Manisha Musale Mane) हिच्या दिशेने सुरू आहे. पण तिच्या तपासातही तिच्या खात्यातील 70 लाख रुपयांच्या पुढे मुद्दा सरकत नाही, त्यातही तिने हे 70 लाख हे पगारातील, तसेच घरबांधणी आणि शेतीसाठी ती रक्कम हातउसने घेतली होती, संबंधितांनी ती परत केली आहे, असेही सांगितले आहे, त्यामुळे मुसळे मानेच्या तपासात ही पोलिसांच्या हाती महिनाभरात काहीही लागले नसल्याचे आतापर्यंतच्या तपासातून दिसून येत आहे.
दरम्यान, शिरीष वळसंगकर यांच्या आत्महत्येमागे गृहकलह असल्याचे डॉक्टरांचे निकटवर्तीय खासगीत सांगतात. त्यामागे डॉक्टरांची सून डॉ शोनाली असल्याचे ते नमूद करतात. पण पोलिस तशी तक्रार करा, मग आम्ही चौकशी करतो, असे सांगत आहेत, त्यामुळे पोलिसांच्या भूमिकेबाबतही चर्चा होत आहे.
डॉ. शोनाली वळसंगकर आणि त्यांचे वडिल डॉ दिलीप जोशी यांची नावे वळसंगकर हॉस्पिटलच्या फलकावरून पुसून टाकण्यात आली आहेत. तसेच, डॉक्टरांच्या आत्महत्येपासून ह्या दोघांनी हॉस्पिटलमध्ये येणे बंद केले होते. तसेच, आत्महत्येनंतर त्यांच्या कुटुंबीयांनी डॉ. शोनाली यांची घरातूनही हकालपट्टी केली आहे. त्यांच्या ओपीडीच्या केबिनवरील नेमप्लेटही काढून टाकण्यात आलेल्या आहेत. हे गृहकलह असल्याचे दर्शवित आहेत. मात्र, पोलिस त्या दिशेने जायला तयार नसल्याचे दिसून येत आहे.
डॉ. वळसंगकर यांच्या आत्महत्या प्रकरणात गृहकलहाकडे दुर्लक्ष करणाऱ्या पोलिस अधिकाऱ्यांनी डॉ. शोनाली यांनी लिहिले पत्र सोशल मीडियात मात्र तातडीने व्हायरल केले होते. त्यामुळे अशा पोलिस अधिकाऱ्यांकडून निष्पक्ष तपासाची अपेक्षा कशी ठेवायाची, असा प्रश्न उपस्थित होत आहे. पोलिस खरंच या आत्महत्येच्या मूळ कारणांपर्यंत पोचणार आहेत की नाही, असाही सवाल उपस्थित होत आहे.
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.