Ichalkaranji News : इचलकरंजी महापालिकेच्या आगामी निवडणुकीच्या पार्श्वभूमीवर शहरातील राजकीय वातावरण चांगलेच तापले आहे. विधानसभा निवडणुकीत मिळालेल्या यशानंतर भाजपकडे अनेक इच्छुकांची पावले वळाली. मात्र उमेदवारीवरून भाजपमधील इच्छुकांचा संताप आणि आक्रोश एकाच वेळी पाहायला मिळत आहे. एकीकडे भाजप आणि शिवसेना एकत्र लढत असताना दुसरीकडे राष्ट्रवादीने स्वतंत्र प्रचाराला सुरुवात केली आहे. एकंदरीतच महायुतीमध्ये कोल्हापुरात पहिली ठिणगी ही इचलकरंजी महानगरपालिकेमध्ये पडण्याची शक्यता आहे. तसे संकेतही स्थानिक राजकारणातून दिसून येत आहेत.
इचलकरंजी महानगरपालिकेमध्ये भाजप आणि शिवसेना एकत्र लढत असताना जवळपास उमेदवारांची नावे निश्चित झाले आहेत. उमेदवारांची नावे निश्चित झाल्या असताना दुसरीकडे निकालाआधीच सर्वांचा विजयाचा आत्मविश्वास वाढला आहे. मात्र महायुतीतला घटक पक्ष असणारा राष्ट्रवादी काँग्रेसमधील पदाधिकाऱ्यांची मानसिकता ही स्वतंत्र लढण्यावरच आहे.
इचलकरंजी शहरातील राजकारणावर छाप असणाऱ्या जांभळे गटाने आपले प्रभुत्व असलेल्या प्रभागामध्ये काही लढती मैत्रीपूर्ण पद्धतीने पार पाडण्याचा प्रयत्न पूर्वीपासून सुरू केल्याचे बोलले जात होते. सुरुवातीला हा प्रयोग मोजक्या प्रभागापुरताच मर्यादित असल्याचे मानले जात होते; मात्र आता हा ट्रेंड इचलकरंजीतील अन्य प्रभागांमध्येही झपाट्याने पसरताना दिसत आहे.
पक्षाकडून अधिकृत उमेदवारी अद्याप जाहीर झालेली नसतानाही अनेक इच्छुक उमेदवारांनी पॅनल टू पॅनल संघर्ष टाळून आपली उमेदवारी सुरक्षित करण्याचे प्रयत्न करीत असल्याची चर्चा होत आहे. अशा परिस्थितीमुळे निवडणूक म्हणजे लोकशाहीतील प्रक्रिया न राहता ती केवळ औपचारिकता बनत चालली आहे की काय, असा प्रश्न उपस्थित होत आहे. सध्या शहरात सुरू असलेल्या अशा वातावरणामुळे काही प्रभागांत तर निवडणूक होण्यापूर्वीच निकाल लागल्याचा भ्रम उमेदवारांमध्ये निर्माण झाल्याचे चित्र दिसून येत आहे.
येत्या दोन दिवसात भाजप आणि शिवसेनेकडून (Shivsena) इचलकरंजी महानगरपालिकेसाठी उमेदवारांची घोषणा होऊ शकते. त्यासंदर्भात उमेदवारांच्या यादीवर जवळपास शिक्कामोर्तब झाल्याचे सांगितले जाते. त्याची कुणकुण भाजपच्या काही इच्छुक पदाधिकाऱ्यांना लागलेली दिसते. इचलकरंजी मध्ये सुरू असलेला भाजपचा जुना नवा वाद यानिमित्ताने पुन्हा एकदा संघर्षाचे रूप घेऊ शकतो.
ज्यांना उमेदवारी मिळाली आहे. त्यांनी आतापासूनच निवडणुकीच्या रणांगणात प्रचाराला सुरुवात केली आहे. तर ज्या उमेदवारांना आपल्या उमेदवारीची खात्री झालेली नाही. अशा इच्छुक उमेदवारांनी मात्र संताप व्यक्त करायला सुरुवात केला आहे. काही ठिकाणी रस्ता रोको तर काही ठिकाणी निदर्शने करण्याची भूमिका भाजपच्या (BJP) कार्यकर्त्यांनी घेतली आहे.
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.