इचलकरंजीत भाजपची आवडे गटाशी युती होणार : चंद्रकांतदादांचे संकेत

इचलकरंजी : नगरपालिका निवडणुकीत कार्यकर्त्यांचा आग्रह स्वबळावर असला तरी पुढील काळात होणाऱ्या घडामोडीनंतर निर्णय घेण्यात येणार आहे, अशी माहिती भाजपचे प्रदेशाध्यक्ष चंद्रकांत पाटील (Chandrakant Patil) यांनी येथे आज (ता. ९ डिसेंबर) दिली. त्यामुळे आगामी पालिका निवडणुकीत आमदार प्रकाश आवाडे (MLA Prakash Awade) यांच्याबरोबर भाजपची युती होण्याचे त्यांनी संकेत दिले. (In Ichalkaranji, BJP will form an alliance with MLA Prakash Awade's group)

पालिकेच्या सार्वत्रिक निवडणूका तोंडावर आल्या आहेत. त्या पार्श्वभूमीवर गुरुवारी (ता. ९ डिसेंबर) सांयकाळी भाजपचे पाटील यांनी इचलकरंजीचा दौरा केला. सुरुवातीला त्यांनी नगराध्यक्षा अलका स्वामी यांच्या निवासस्थानी भेट दिली. त्यांच्यासमवेत जिल्हाध्यक्ष समरजितसिंह घाटगे होते. वस्त्रोद्योग महासंघाचे अध्यक्ष अशोक स्वामी यांनी त्यांचे स्वागत केले. यावेळी पाटील यांनी पत्रकारांशी संवाद साधला.

ते म्हणाले, ‘‘पालिकेच्या आगामी निवडणुकीच्या निमित्ताने आज आपण इचलकरंजीला भेट देत आहे. प्रमुख कार्यकर्त्यांची भेट घेऊन निवडणुकीसंदर्भात चर्चा करणार आहे. पालिकेची निवडणूक स्वबळावर लढविण्याचा कार्यकर्त्यांचा आग्रह आहे. आमदार आवाडे यांच्याबरोबर युतीबाबत अद्याप निर्णय झालेला नाही. पण पुढे होणाऱ्या घडामोडीनंतर याबाबतचा ठोस निर्णय घेतला जाईल.’’ भाजपचे शहराध्यक्ष अनिल डाळ्या, शहाजी भोसले, नगरसेवक किसन शिंदे, युवराज माळी, माजी नगरसेवक दिलीप मुथा, सुनिल तोडकर, विश्वनाथ मेटे, सलीम शिकलगार आदी उपस्थीत होते.

युती की स्वबळ : हाळवणकर घेणार निर्णय

माजी आमदार हाळवणकर यांच्या उपस्थितीत पाटील यांनी भाजपच्या प्रमुख पदाधिकारी, कार्यकर्ते, नगरसेवकांशी संवाद साधला. पालिका निवडणुकीबाबत भूमिका जाणून घेतली. संभाव्य युतीबाबत कार्यकर्त्यांनी विचारणा केली. त्याबाबत युती करायची की स्वबळावर निवडणूक लढवायची याचे सर्वाधिकार माजी आमदार हाळवणकर यांच्याकडे राहतील, असे पाटील यांनी सांगितले. नगरसेवकांच्या अडचणी ऐकून घेतल्या. नगरसेवकांसह कार्यकर्त्यांनी जनसंपर्क वाढविण्याचे आवाहनही त्यांनी केले.