Mahapalika Nivadnuk : बालेकिल्ल्यातच विनय कोरेंच्या पक्षाला घरचा रस्ता; सांगली, कोल्हापुरात भाजप-शिवसेनेने जवळही केले नाही!

Kolhapur Sangali Mahapalika Election : कोल्हापूर आणि सांगली महानगरपालिकेमध्ये महायुतीमध्ये एकेक जागा वाटपावरून भाजप आणि शिवसेनेमध्ये सुप्तसंघर्ष सुरू आहे. कोल्हापुरात महायुती म्हणून एकत्र लढण्याचा निर्णय झाला आहे. तर सांगलीत भाजप आणि शिवसेना एकत्र लढण्याच्या तयारीत आहे. असे प्राथमिक चित्र असलं तरी कोल्हापूर आणि सांगली महानगरपालिकेमध्ये भाजपचा घटक पक्ष असलेल्या जनसुराज्य शक्तीला घरचा रस्ता दाखवला आहे.

कोल्हापूर आणि सांगली, मिरज, कुपवाड या महानगरपालिकेत भाजप-शिवसेना आणि राष्ट्रवादी काँग्रेसने आमदार विनय कोरे यांच्या जनसुराज्य शक्तीला जागा वाटपात कोणतच स्थान दिलेलं नाही. सरकारनामाने यापूर्वी या संदर्भातील बातमी दिली होती. अखेर त्या बातमीवर आज शिक्कामोर्तब झाले.

कोल्हापूर महानगरपालिकेमध्ये जनसुराज्य शक्तीने गेल्या 25 वर्षांपासून आपला दबदबा ठेवला होता. मात्र 2009 च्या महानगरपालिका निवडणुकीत सत्तांतर झाल्यानंतर जनसुराज्यचा प्रभाव कमी होत गेला. सध्या जनसुराज्य शक्ती हा महायुतीचा घटक पक्ष असला तरी महानगरपालिकेच्या राजकारणात कोणतेच स्थान नाही.

कोल्हापूर महानगरपालिकेत शिवसेना राष्ट्रवादी आणि भाजपकडून महायुती म्हणून लढत असताना जागा वाटपामध्ये अखेरच्या क्षणापर्यंत चुरस निर्माण झाली आहे. अशातच जनसुराज्य शक्तीने स्वतंत्र मुलाखती घेतल्या आहेत. तर भाजपच्या पदाधिकाऱ्यांकडून महायुतीमध्ये जनसुराज्य पक्षाला एकही जागेवर उमेदवारी नसल्याचे स्पष्टीकरण देण्यात आहे .

कोल्हापूर महानगरपालिकेमध्ये पक्षीय राजकारण नव्हते. त्या काळात विचित्र राजकारण सुरू असल्याने कोल्हापूरची चर्चा राज्यात व्हायची. 2 ते 3 महिन्याचा महापौर व्हायचा. पण जनसुराज्य शक्ती पक्षाने उशिरा का असेना लक्ष घातले आहे. एक नवा विचार देण्यासाठी आम्ही या रिंगणात उतरत आहोत. अशी भूमिका आमदार विनय कोरे यांनी मांडली.

दरम्यान दोनच दिवसांपूर्वी आमदार विनय कोरे, आमदार अशोकराव माने, प्रदेशाध्यक्ष समित कदम यांच्या उपस्थितीत जनसुराज्य शक्तीकडून एका हॉटेलमध्ये इच्छुक उमेदवारांच्या मुलाखती घेतल्या. त्यामुळे जनसुराज्य शक्ती हा महानगरपालिकेच्या राजकारणात काही जागांवर स्वतंत्र लढण्याची शक्यता व्यक्त केली जात आहे.