Kolhapur News: अनेक वर्ष एकमेकांच्या विरोधात ठाकलेले करवीर विधानसभा मतदारसंघातील नरके आणि पाटील गट आता मनोमिलनाच्या तयारीत आहे. दिवंगत आमदार पी एन पाटील यांचे पुत्र जिल्हा परिषदेचे माजी अध्यक्ष राहुल पाटील यांनी राष्ट्रवादी काँग्रेसमध्ये पक्षप्रवेश केल्यानंतर महायुती म्हणून आगामी जिल्हा परिषद निवडणुकीत शिवसेनेला सोबत घ्यावे लागणार आहे. राजकीय कट्टर विरोधक असलेले आमदार चंद्रदीप नरके आणि त्यांच्या गटांसोबत जावे लागणार आहे. त्यामुळे वरिष्ठ स्तरावर या दोन नेत्यांचे मनोमिलन करण्यासंदर्भात चर्चा अंतिम टप्प्यात आहे.
येणाऱ्या काळात करवीर विधानसभा मतदारसंघातील दोन राजकीय गट एकत्र येण्याची शक्यता आहे. मात्र कार्यकर्त्यांना एकरूप ठेवणं या दोन्ही नेत्यांसाठी आवाहन असणार आहे. करवीर विधानसभा मतदारसंघात सध्या आगामी जिल्हा परिषद निवडणुकीचे वारे वाहू लागले आहेत. या निवडणुका डोळ्यासमोर ठेवून आमदार चंद्रदीप नरके व माजी गृहराज्यमंत्री सतेज पाटील यांच्यात खरी चुरस होणार आहे.
महायुतीमध्ये असणाऱ्या राष्ट्रवादी व भाजपकडून सुद्धा पाटील यांना आव्हान दिले जाऊ शकते. विधानसभा निवडणुकीत काँग्रेसचे उमेदवार असलेले राहुल पाटील यांनी महायुती मधील राष्ट्रवादीत प्रवेश केल्यानंतर सहाजिकच ते महायुती म्हणून काम करतील. पण नरके गटासोबत कितपत जुळवून घेतील हे पाहणे महत्त्वाचे आहे. त्यामुळे राहुल पाटील यांची भूमिका काय असेल? याविषयी मतदारसंघात चर्चा सुरू आहे.
महायुतीबाबत स्थानिक पातळीवर निर्णय होणार असला तरी करवीर विधानसभा मतदारसंघातील जागा वाटपा संदर्भात महायुतीमध्ये जिल्हा परिषद व पंचायत समितीच्या महायुतीच्या जागावाटप करण्याबाबत वरिष्ठ नेत्यांकडून प्रयत्न सुरू आहेत. सद्यस्थितीत आमदार चंद्रदीप नरके व काँग्रेसचे निष्ठावंत आमदार व माजी जिल्हाध्यक्ष पी एन पाटील त्यांचे सुपुत्र राहुल पाटील एकत्र येणार असल्याची शक्यता आहे.
मागील काही वर्षांचा इतिहास पाहिला तर करवीर विधानसभा मतदारसंघांमध्ये नरके गट विरुद्ध पाटील गट असा संघर्ष पाहायला मिळाला. अलीकडच्या काळात पाटील गटाला काँग्रेस नेते आमदार सतेज पाटील यांची साथ मिळाली. मात्र सध्याची परिस्थिती पाहता काँग्रेसने ते आमदार सतेज पाटील हे महाविकास आघाडी मधून निवडणूक लढवणार असल्याने नरके आणि राहुल पाटील यांचा सामना करावा लागणार आहे.
आगामी जिल्हा परिषद व पंचायत समिती निवडणूकीच्या निमित्ताने गटातटामध्ये ईर्ष्या सुरू झाली आहे. राष्ट्रवादीचे नेते मंत्री हसन मुश्रीफ यांनी एका समारंभात बोलताना नरके व राहुल पाटील एकत्र चहा पितील असे बोलून या दोघांना एकत्र आणण्याचे संकेत दिले आहेत. मात्र आमदार सतेज पाटील यांच्यापेक्षा पहिले आव्हान कार्यकर्त्यांच्या मनोमेलनाची आहे.
गेली अनेक वर्ष एकमेकांच्या विरोधात असलेला नरके गट आणि पाटील गट हा सहजासहजी एकत्र येईल याचे चित्र सध्या धूसर आहे. मात्र जसजशी जिल्हा परिषद निवडणूक जवळ येईल तस तसे जागा वाटपा संदर्भात कार्यकर्त्याला विचारात घेऊनच निर्णय घ्यावा लागणार आहे. शिवाय कार्यकर्ता देखील कोणती भूमिका घेणार हे महत्त्वाचे आहे
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.