Solapur BJP : महापौरपदाच्या ‘रेस’मधील नरेंद्र काळेंची भाजपकडून गटनेतेपदी बोळवण....

Solapur, 31 January : सोलापूर महापालिकेत भारतीय जनता पक्षाच्या गटनेतेपदी माजी शहराध्यक्ष नरेंद्र काळे यांची निवड करण्यात आली आहे, त्यामुळे सोलापूरचा महापौर कोण होणार, याची उत्सुकता वाढली आहे. काळे यांचेही नाव महापौरपदासाठी चर्चेत होते. मात्र, आता त्यांची गटनेता म्हणून बोळवण करण्यात आल्याचे मानले जात आहे. आता सोलापूरच्या महापौरपदी कोणाला संधी दिली जाते, याकडे सोलापूर शहराचे लक्ष लागले आहे.

सोलापूर महापालिकेच्या निवडणुकीत भारतीय जनता पक्षाने (BJP) ऐतिहासिक कामगिरी नोंदवत 102 पैकी 87 नगरसेवक निवडून आले आहेत. भाजपने निवडणुकीत केलेल्या या कामगिरीमुळे सोलापूर शहराचा महापौर, गटनेता, स्थायी समिती सभापती, सभागृह नेता या पदांवर कोणाला संधी मिळणार, याची उत्सुकता होती.

सोलापूर महापालिकेतील भाजपचे 87 नगरसेवक गटनोंदणीसाठी आज पुण्यात विभागीय कार्यालयात गेले होते. भाजप नगरसेवकांच्या गटाची नोंदणी केल्यानंतर त्याठिकाणीच महापालिकेतील गटनेतेपदी नरेंद्र काळे (Narendra Kale) यांची नियुक्ती करण्यात आली. तशी नोंदणीही करण्यात आली आहे.

सोलापूरच्या महापौरांची येत्या 6 फेब्रुवारीला निवड करण्यात येणार आहे. महापौरपदासाठी नरेंद्र काळे, डॉ. किरण देशमुख, अनंत जाधव, विनायक कोंड्याल हे प्रमुख नगरसेवक चर्चेत होते. त्यातील नरेंद्र काळे यांची गटनेतेपदी आज पुण्यात निवड करण्यात आली आहे, त्यामुळे काळे यांच्या महापौरपदाचे काय, अशी चर्चा होत आहे.

नरेंद्र काळे हे सोलापूर महापालिकेत तिसऱ्यांदा निवडून आले आहेत. यापूर्वी त्यांनी महापालिकेत विरोधी पक्षनेते म्हणूनही काम केले आहे. तसेच काळे यांनी भापजचे शहराध्यक्षपदही भूषविले आहे. त्यामुळे नरेंद्र काळे यांना या वेळी महापौरपदाची संधी मिळेल, अशी शक्यता वर्तविण्यात येत होती. मात्र, त्यांची गटनेतेपदी नियुक्ती केली आहे.