Prashant Koratkar : मुंबई उच्च न्यायालयाचा कोरटकरला झटका, आता कोणत्याही क्षणी होऊ शकते अटक

Kolhapur News : छत्रपती शिवाजी महाराज यांच्याबद्दल आक्षेपार्ह विधान करणाऱ्या आणि इतिहास संशोधक इंद्रजीत सावंत यांना धमकी देणाऱ्या प्रशांत कोरटकरला आज मुंबई उच्च न्यायालयाने झटका दिला आहे. तर उच्च न्यायालयाकडून कोल्हापूर जिल्हा सत्र न्यायालय देखील ताशेरे ओढले आहेत.

कोल्हापूरच्या न्यायालयाने केलेली निरीक्षणे काढून टाकण्याचे मुंबई उच्च न्यायालयाने निर्देश दिलेत. प्रशांत कोरटकरचा मोबाईल हॅक झाल्याचं निरीक्षण कोल्हापूरच्या न्यायालयाने नोंदवले होते. दरम्यान, स्थानिक कोर्टात आमची बाजू ऐकून घेतली नाही. त्यामुळे आज दुपारी कोल्हापूर न्यायालयात होणाऱ्या सुनावणीत सरकारी पक्षाची बाजू ऐकून घेण्याची विनंती मुंबई उच्च न्यायालयात सरकारी वकिलांनी केली.

उच्च न्यायालयाने कोल्हापूर जिल्हा सत्र न्यायालयावर ताशेरे ओढत, राज्य सरकारची बाजू ऐकून प्रकरणावर योग्य तो निर्णय द्या, असे निर्देश दिले आहेत. तर जुना राजवाडा पोलीस ठाण्याने आणि राज्य सरकारकडून कोरटकर याचा अंतरिम जामीन रद्द करण्याची मागणी केली होती. त्यावर उच्च न्यायालयाने कोरटकरला दिलेला अंतरिम दिलासा आज संपतोय. त्यामुळे सत्र न्यायालयाचा आदेश रद्द करण्याची गरज नाही, असे स्पष्ट केले.

प्रशांत कोरटकरचा अंतरिम जमीन रद्द करण्यासाठी राज्य सरकारने मुंबई उच्च न्यायालयात धाव घेतली होती. न्यायमूर्ती राजेश पाटील यांच्या एकलपीठासमोर सुनावणी सुरू झाली. प्रशांत कोरटकर तपासाला सहकार्य करत नसल्याने राज्य सरकारने उच्च न्यायालयात धाव घेतली होती. आत्तापर्यंत एकदाही तपास अधिकाऱ्यासमोर हजर न झाल्याने तपासात अडचणी येत असल्याचा राज्य सरकारने युक्तिवाद केला.

दरम्यान आज दुपारी तीन वाजता कोल्हापूर जिल्हा सत्र न्यायालयात कोरटकर याच्या बाबत सुनावणी होणार आहे. मुंबई उच्च न्यायालयाने दिलेल्या निर्देशानंतर जिल्हा न्यायालय त्यावर काय निर्णय देणार याकडे लक्ष लागून राहिले आहे. दरम्यान या निकालानंतरच प्रशांत कोरटकर याला कोणत्याही क्षणी अटक होण्याची शक्यता आहे.

(२५ वर्षे पूर्ण करणारा ई-सकाळ आता कॉमस्कोअरमध्ये नंबर १. डिजिटल माध्यमांच्या क्षेत्रातली नवी झेप)