Raju Shetti : 'शेतकऱ्यांचे नुकसान होणार असेल तर...'; राजू शेट्टींचा कारखानदारांना थेट इशारा

Kolhapur News: "जे लोकं जिल्हा बँकेच्या निवडणुकीत एकमेकांच्या विरोधात लढले, ते लोकं आता एकत्र येऊन ऊस उत्पादक शेतकऱ्यांना मातीत घालण्यासाठी प्रयत्न करत आहेत. स्वत:च्या तुंबड्या भरून घेण्यासाठी शेतकऱ्यांना देशोधडीस लावणार असतील, तर मी स्वस्थ बसणार नाही.

शेतकऱ्यांचे नुकसान होणार असेल, तर मी कोणालाही अंगावर घेण्यास तयार असल्याचा इशारा स्वाभिमानी शेतकरी संघटनेचे नेते राजू शेट्टी यांनी दिला. 2 नोव्हेंबर रोजी होणाऱ्या मोटार सायकल रॅलीच्या पार्श्वभूमीवर बुधवारी शिरोळ येथील निवासस्थानी प्रमुख पदाधिकारी यांची बैठक झाली. त्यावेळी ते बोलत होते.

"जिल्ह्यातील साखर कारखानदार एकत्र येऊन ऊस उत्पादक शेतकऱ्यांना दुसरा हप्ता देण्यास नकार देऊन चालू गळीत हंगामातील एफआरपी जाहीर करून गळीत हंगाम सुरू करत आहेत. हे आम्हाला मान्य नाही. पुढील वर्ष साखर उद्योगासाठी चांगले जाणार आहे.

साखरेला जवळपास 3600 पासून ते 4200 रुपयांपर्यंत दर मिळणार आहेत. यामुळे यावर्षी एफआरपी आम्हाला मान्य नसून ऊस परिषदेत जो दर ठरेल तो घेतल्याशिवाय आम्ही हंगाम सुरू देणार नाही", असा थेट इशारा राजू शेट्टी यांनी दिला आहे.

(राजकारणातील महत्त्वाच्या बातम्यांचे अपडेट्ससाठी सरकारनामाचे अधिकृत WhatsApp चॅनल फॉलो करा!)

मोटारसायकल रॅली कार्यकर्त्यांनी शांततेने पूर्ण करून ज्या ठिकाणी ऊसतोडी सुरू आहेत, त्या बंद कराव्यात. ज्या ठिकाणी पोलिस बळाचा वापर केला जाईल, तिथे गांधीजींच्या मार्गाचा अवलंब करावा. मात्र, जर कारखानदारांनी दादागिरी केली, तर जशास तसे उत्तर द्या. वेळप्रसंगी कायदा हातात घेऊन या ठिकाणी गुन्हे दाखल झाल्यास वकिलांची फौज दाखल करू, मात्र आपल्या घामाच्या दामासाठीची लढाई जिंकूनच शांत बसायचे आहे, असेही राजू शेट्टी म्हणाले.

दरम्यान, या वेळी सावकर मादनाईक, विठ्ठल मोरे, वैभव कांबळे, राम शिंदे, शैलेश आडके, सचिन शिंदे, सागर शंभूशेटे, रामचंद्र फुलारे, राजगोंडा पाटील, अजित पाटील, राजाराम देसाई यांच्यासह आदी पदाधिकारी उपस्थित होते.

Edited By- Ganesh Thombare