Hatkanangale Nagarpanchayat : श्रेयवादावरून सत्ताधारी-विरोधक भिडले, हातकणंगले नगरपंचायतीच्या सभेत गोंधळ

Hatkanangale Nagarpanchayat News: एकमेकांच्या प्रभागांत कामे मंजूर करण्यावरून आज (सोमवारी) हातकणंगले नगरपंचायतीच्या वार्षिक सर्वसाधारण सभेत सत्ताधारी आणि विरोधक भिडले. श्रेयवादावरून दोघांमध्ये जोरदार वादावादी झाली. आपापल्या वार्डाला निधीवरून दोन नगरसेवकांमध्ये चांगलीच बाचाबाची झाली. अखेर दोन तासानंतर इतर नगरसेवकांनी मध्यस्थी करत निधी मंजूर केला. मात्र श्रेयवादावरून झालेली वादावादी शेवटच्या सभेत चांगलीच चर्चेचा विषय ठरली.

हातकणंगले नगरपंचायतीची मुदत संपत आल्याने आज (सोमवारी) शेवटच्या बैठकीचे आयोजन करण्यात आले होते. सभेच्या अध्यक्षस्थानी नगराध्यक्ष अर्चना जानवेकर होत्या . यावेळी प्रभाग क्रमांक पाचमध्ये निधी लाटण्यावरून काही सदस्यांमध्ये वादावादी झाली . सुमारे दोन तास ही चर्चा सुरूच होती. शेवटी स्थानिक नगरसेवकांना विश्वासात घेऊनच निधी मंजूर करण्याचा ठराव बहुमताने मंजूर करण्यात आला .

सांडपाणी प्रक्रीया केंद्र येत्या दीड वर्षात पूर्ण करण्याचे पत्र संबंधित यंत्रणेला दिले असून ते पूर्ण न झाल्यास सुमारे अडीच कोटीचा दंड नगरपंचायती कडून वसूल करण्यांत येणार असल्याची माहिती मुख्याधिकारी विशाल पाटील यांनी यावेळी दिली .

अंतर्गत रस्ते, डॉ.बाबासाहेब आंबेडकर भवन इमारत रंगकाम, स्मारक शिल्प सुरक्षा, वाचनालयांत स्पर्धा परीक्षा मार्गदर्शनपर पुस्तके, विनापरवाना फलक, सानुग्रह अनुदान यावर सविस्तर चर्चा करण्यांत आली. कचरा उचलण्याच्या ठेक्याची मुदत सप्टेंबर अखेर संपली असतानाही त्याला मुदतवाढ देण्यावरही काही जणांनी आक्षेप घेतला . त्यावर विशेष सभा घेऊन निर्णय घेण्याचे ठरले .