Teacher News : शिक्षक मान्यतेसाठी मुदतवाढ, पुणे विद्यापीठाचा महाविद्यालयांना दिलासा

Pune University News : सावित्रीबाई फुले पुणे विद्यापीठाशी संलग्न महाविद्यालये आणि मान्यताप्राप्त संस्थांमध्ये २०२६-२७ या शैक्षणिक वर्षासाठी स्थानिक निवड समितीमार्फत नियुक्त करण्यात येणाऱ्या अध्यापकांच्या शिक्षक मान्यतेच्या प्रस्तावांसाठी विद्यापीठाने मुदतवाढ दिली आहे. अध्यापक भरतीसाठी जाहिरात प्रसिद्ध करण्याची मुदत १५ ऑक्टोबरपर्यंत, तर शिक्षक मान्यतेचे प्रस्ताव ऑनलाइन सादर करण्याची मुदत ३० ऑक्टोबरपर्यंत वाढवण्यात आली आहे. त्यामुळे संबंधित महाविद्यालयांना प्रस्ताव सादर करण्यासाठी अतिरिक्त वेळ मिळणार आहे.

सावित्रीबाई फुले पुणे विद्यापीठाने यापूर्वी २०२६-२७ या शैक्षणिक वर्षात स्थानिक निवड समितीमार्फत नियुक्त करण्यात येणाऱ्या अध्यापकांच्या शिक्षक मान्यतेचे प्रस्ताव ऑनलाइन पद्धतीने ३० सप्टेंबरपर्यंत सादर करण्याच्या सूचना दिल्या होत्या. तसेच, त्यासंदर्भातील आवश्यक कागदपत्रे पुढील १० दिवसांत विद्यापीठाकडे जमा करण्यास सांगितले होते. स्थानिक निवड समितीचे आयोजन केल्यानंतर त्याचा अहवाल ४८ तासांत ऑनलाइन पद्धतीने, तर ७२ तासांत मूळ अहवालाची प्रत विद्यापीठाकडे सादर करण्याचे निर्देशही देण्यात आले होते.

विविध महाविद्यालयांनी २०२६-२७ या शैक्षणिक वर्षासाठी तात्कालिक स्वरूपात नियुक्त करण्यात येणाऱ्या अध्यापकांच्या शिक्षक मान्यतेचे प्रस्ताव सादर करण्यासाठी मुदतवाढ देण्याची विनंती विद्यापीठ प्रशासनाकडे केली होती. या मागणीचा विचार करून विद्यापीठाने जाहिरात प्रसिद्ध करण्यासाठी १५ ऑक्टोबरपर्यंत आणि स्थानिक निवड समितीमार्फत नियुक्त अध्यापकांच्या शिक्षक मान्यतेचे प्रस्ताव ऑनलाइन सादर करण्यासाठी ३० ऑक्टोबरपर्यंत मुदतवाढ दिली आहे. या मुदतीत संबंधित महाविद्यालये आणि मान्यताप्राप्त संस्थांनी स्थानिक निवड समितीचे आयोजन करून शिक्षक मान्यतेसाठीचे प्रस्ताव विद्यापीठाकडे सादर करणे अनिवार्य आहे.

आवश्यक कागदपत्रे सादर करणे बंधनकारक

निवड झालेल्या अध्यापकांची शैक्षणिक अर्हतेची प्रमाणपत्रे, अनुभव प्रमाणपत्रे, यापूर्वीची मान्यता पत्रे आणि इतर आवश्यक कागदपत्रे ऑनलाइन पद्धतीने अपलोड करणे आवश्यक आहे. तसेच, या कागदपत्रांच्या छायांकित प्रती स्थानिक निवड समितीच्या मूळ अहवालासोबत विद्यापीठाकडे सादर कराव्या लागणार आहेत.

मुदतीनंतर प्रस्ताव स्वीकारले जाणार नाहीत

विद्यापीठाने दिलेल्या मुदतीतच संबंधित महाविद्यालये आणि मान्यताप्राप्त संस्थांनी शिक्षक मान्यतेचे प्रस्ताव सादर करावेत, असे स्पष्ट करण्यात आले आहे. निर्धारित मुदतीनंतर तात्कालिक स्वरूपातील शिक्षक मान्यतेचे प्रस्ताव स्वीकारले जाणार नाहीत. तसेच, यापुढे या प्रक्रियेसाठी कोणतीही मुदतवाढ दिली जाणार नसल्याचे विद्यापीठ प्रशासनाने स्पष्ट केले आहे.