Babandada Shinde : शरद पवार गटातील नेत्याच्या ‘त्या’ विधानामुळे बबनदादांबाबतचे गूढ आणखी वाढले...

Solapur, 23 September : उपमुख्यमंत्री अजित पवार यांनी आमदार बबनराव शिंदे यांच्या माढा मतदारसंघात जनसन्मान यात्रा काढली. या यात्रेच्या निमित्ताने शक्तिप्रदर्शन करत बबनदादांनी आपणही तयारीत असल्याचे स्पष्ट केले आहे. पण, त्यांचे पारंपारिक विरोधक संजय कोकाटे यांनी उपमुख्यमंत्री अजित पवार यांना उत्तर देताना ‘तुम्हाला येत्या पंधरा दिवसांतच कळेल की, माढ्याचा हा दादा कसा आहे,’ असे विधान केल्याने त्यांच्याविषयी पुन्हा संभ्रम निर्माण झाला आहे. मध्यंतरी त्यांनी शरद पवारांची भेट घेतली, त्या वेळी अशीच चर्चा रंगली होती.

राष्ट्रवादी काँग्रेसच्या आमदाराला ताकद मिळावी, संबंधित आमदाराच्या पाठीशी पक्ष ठामपणे उभा आहे, असा संदेश विरोधकांमध्ये जावा, या उद्देशाने राज्यात अजित पवार (Ajit Pawar) हे जनसन्मान यात्रा काढत आहेत. आगामी विधानसभा निवडणुकीत यश मिळावे, असा त्यामागचा उद्देश आहे. ती जनसन्मान यात्रा रविवारी सोलापूर जिल्ह्यातील मोहोळ आणि माढा तालुक्यातून काढण्यात आली होती.

टेंभुर्णी येथील कार्यक्रमात बोलताना अजित पवार यांनी ‘बबनदादांचे (Babanro Shinde) विरोधक मंदिरात जाऊन एकास एक उमेदवार देण्याबाबत शपथा घेतात. ते कामांचे असून त्यांचे विरोधक बिनकामाचे आहेत,’ अशी टीका केली होती.

त्या टीकेला आज शरद पवार गटाचे नेते संजय कोकाटे (Sanjay Kokate) यांनी उत्तर दिले. ते म्हणाले आम्ही मंदिरात गेलो हे खरे आहे. पण मंदिरात कोण जातं? ज्यांनी चोऱ्या केलेल्या नाहीत, त्यांना मंदिरात जाण्याची परवानगी आहे.

‘तुमचे बबनदादा, किती कामाचे आहेत, हे सगळ्या तालुक्याने बघितलेले आहे. फक्त आता तालुका विकायचाच राहिलेला आहे. मी कधीही माढा विधानसभा मतदारसंघाच्या बाहेर डोकावत नाही किंवा मोठ्या नेतेमंडळींच्या विरोधात कधी बोलत नाही. पण, आपण इतके खाली आला आहात की आमच्यासारख्या कार्यकर्त्यावर बोलायला लागला. त्यामुळे आम्हाला उत्तर देणं भाग पडलं आहे, असेही कोकाटे यांनी सांगितले.

तुम्ही काल म्हणालात लाथ घालीन तिथं पाणी काढण्याची धमक पाहिजे. ती धमक पूर्वी तुमच्यात होती. पण आज ती धमक तुमच्यात राहिली नाही. तुमच्या बबनदादांमध्ये तर नाहीच नाही...

आणि हो, तुमच्या दादांनी काल घड्याळाचं नावसुद्धा घेतलं नाही. ज्याला उभं करायचं आहे, त्याला (माढ्यातून बबनराव शिंदे यांच्या चिरंजीव रणजित शिंदे यांची उमेदवारी खुद्द बबनदादांनी घोषित केली आहे) स्टेजवरसुद्धा आणलं नव्हतं. तुम्हाला येत्या पंधरा दिवसांतच कळेल की माढ्याचा हा दादा कसा आहे, असा दावा केला आहे.

आमची तुम्हाला विनंती आहे की, इतरांविषयी विचार करून बोला. आम्ही सामान्य कार्यकर्ते असू पण आम्ही कोणाची चोरी केलेली नाही. त्यामुळे बबनदादांची स्तुती करताना त्यांच्या विरोधकांचा अपमान करू नये, हीच आमची अपेक्षा आहे, असेही कोकाटे यांनी म्हटले आहे.

दरम्यान, काही दिवसांपूर्वी आमदार बबनराव शिंदे आणि त्यांचे चिरंजीव रणजित शिंदे यांनी ज्येष्ठ नेते शरद पवार यांची भेट घेतली होती. त्यावेळी ते शरद पवार यांच्या राष्ट्रवादीत प्रवेश करणार अशी चर्चा रंगली होती. त्यानंतर आता संजय कोकाटे यांनी पुन्हा बबनदादांबाबत विधान केल्याने पुन्हा एकदा बबनराव शिंदेंबाबत गूढ पुन्हा वाढले आहे.