Solapur, 20 June : महाराष्ट्र नवनिर्माण सेनेचे नेते बाळा नांदगावकर हे देवदर्शनासाठी सोलापूरच्या दौऱ्यावर आले आहेत, त्यावेळी सोलापुरातील शिवसैनिकांनी नांदगावकर यांची भेट घेऊन त्यांचे स्वागत केले. राज आणि उद्धव ठाकरे यांची एकत्र येण्याची चर्चा राज्यात सुरू आहे. त्या पार्श्वभूमीवर शिवसैनिकांनी नांदगावकर यांची घेतलेली भेट ही स्थानिक पातळीवरील महाराष्ट्र नवनिर्माण सेनेचे कार्यकर्ते आणि शिवसैनिकांमध्ये मनोमिलनाला सुरुवात झाल्याची चर्चा रंगली आहे.
मनसे नेते बाळा नांदगावकर (Bala Nandgaonkar) यांचे आज सोलापुरात ठाकरे गटाचे शहर प्रमुख महेश धाराशिवकर आणि उपजिल्हाप्रमुख प्रताप चव्हाण यांनी स्वागत करून सत्कार केला. या वेळी महाराष्ट्र नवनिर्माण सेनेचे प्रमुख नेते आणि पदाधिकारीही उपस्थित होते.
शिवसेनेतून बाहेर पडलेले छगन भुजबळ (Chhagan Bhujbal) यांचा पराभव करून बाळा नांदगावकर प्रचंड मतांनी निवडून आले होते, तेव्हा दोन भावांनी (राज-उद्धव) जसा जल्लोष केला होता, तो जल्लोष परत यावा, ही शिवसैनिक म्हणून विनंती, असे नांदगावकर यांच्या सत्कारानंतर शिवसेना उद्धव बाळासाहेब ठाकरे पक्षाचे उपजिल्हाप्रमुख प्रताप चव्हाण यांनी दोन्ही ठाकरे बंधूंच्या युतीसाठी प्रयत्न करण्याचे आवाहन केले.
प्रताप चव्हाण यांच्या विनंतीला बाळा नांदगावकर यांनी केवळ स्मितहास्य करत आभार मानले. दरम्यान, राज ठाकरे (Raj Thackeray) आणि उद्धव ठाकरे यांच्या एकत्र येण्याबाबत भाष्य केले आहे. राज ठाकरे यांच्या मनात काय हेही मी जाणून घेत आहे. बाळासाहेब ठाकरे हयात असताना या दोघांना एकत्र आणण्याचा प्रयत्न मी केला होता, अशी आठवणही नांदगावकर यांनी सांगितली.
सोलापुरातील मनसे आणि शिवसेना कार्यकर्त्यांनी घेतलेल्या भेटीवर नांदगावकर यांनी स्पष्टीकरण दिले आहे. ते म्हणाले, मी शिवसेनेमध्ये असताना सोलापूरचा संपर्कप्रमुख होतो. त्यावेळी मी माझ्या नेतृत्वामध्ये चार आमदारही निवडून आणले होते. त्यातील एक मंत्री झाले होते. तेव्हापासून माझे सोलापूर जिल्ह्यातील सगळ्या स्तरावर कार्यकर्त्यांशी जिव्हाळ्याचे संबंध आहेत.
ते माझ्या कुटुंबातील लोक आहेत आणि बाळा नांदगावकर सोलापूरला आल्यानंतर ते नेहमीच भेटायला येतात. मुंबईला आल्यावरही मला भेटतात. सोलापूरवर माझं विशेष प्रेम पूर्वीही होतं, आताही आहे आणि यापुढेही कायम राहील, मनसे नेते नांदगावकर यांनी स्पष्ट केले.
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.