Shivsena UBT-MNS Alliance : फडणवीस, शिंदेंनी जोर लावला पण उद्धव ठाकरे अजूनही आशावादी... 'राज'सोबतच्या युतीबाबत क्लिअर सांगितलं!

Shivsena UBT-MNS Alliance : "जे तुमच्या आणि राज्याच्या मनात आहे तेच करणार आहे. पण ते होऊ नये, मराठी माणसाची शक्ती एकत्र येऊ नये म्हणून प्रयत्न सुरु आहेत", असे म्हणत शिवसेना उद्धव बाळासाहेब ठाकरे पक्षप्रमुख उद्धव ठाकरे यांनी मनसेसोबत युती होणार की नाही या चर्चांवर पूर्णविराम दिला. ते शिवसेनेच्या 59 व्या वर्धापनदिन सोहळ्यात बोलत होते.

मागील काही दिवसांपासून मनसे आणि शिवसेना उद्धव बाळासाहेब ठाकरे पक्षांच्या युतीबाबत चर्चा सुरु आहे. अशात मागील आठवड्यात मनसे अध्यक्ष राज ठाकरे आणि मुख्यमंत्री देवेंद्र फडणवीस यांची एका पंचतारांकित हॉटेलमध्ये भेट झाली. या भेटीनंतर राज ठाकरे नेमके कोणासोबत युती करणार? भावासोबतच्या युतीचे काय होणार? असे प्रश्न विचारले जात होते.

याबाबत उद्धव ठाकरे म्हणाले, सगळीकडे बातम्या सुरु आहेत. युती होणार का नाही होणार? हे कळेलच. जे तुमच्या आणि राज्याच्या मनात आहे तेच मी करणार आहे. पण ते होऊ नये, मराठी माणसाची शक्ती एकत्र येऊ नये म्हणून यांच्या मालकांचे नोकर इकडे गाठीभेटी घ्यायला लागले. मुंबईवर यांना ताबा मिळाली नाही, जर मराठी माणसाच्या ताब्यात गेली तर मालकाच्या मित्राचे कसे होणार? अदानींचे कसे होणार? याची चिंता आहे.

त्यामुळे मराठी माणसाची शक्ती एकवटता कामा नये यासाठी मालकाचे नोकर आणि या नोकरांच्या नोकरांचे किती प्रयत्न सुरु आहेत. होणारच नाहीत, होणारच नाहीत, अरे तुला काय करायचं? आमचं आम्ही बघू आमचं काय करायचं. पण जर तुम्हाला कोणाला वाटत असेल तुम्ही शिवसेना प्रमुखांचा ब्रँड पुसून टाकाल तर तुमचे नामोनिशाण महाराष्ट्रातून पुसून टाकल्याशिवाय राहणार नाही, असा इशाराही यावेळी उद्धव ठाकरे यांनी दिला.