Shivsena Sangli : सांगलीत शिवसेनेचे पहिल्यांदाच 3 शिलेदार, 'स्थानिक'च्या निवडणुकीत बळ मिळणार

Sangli News, 30 Oct : लोकसभा आणि विधानसभा निवडणुकीतील यश आणि अपयशानंतर आगामी स्थानिक स्वराज्य संस्थेच्या निवडणुकीत शिवसेनेची भूमिका नेमकी काय असणार? याकडे जिल्हा वासियांचे लक्ष लागून राहिलं होतं.

शिवाय सांगलीचे पालकमंत्री चंद्रकांत पाटील यांनी सुरुवातीपासूनच महायुतीमधील मोठा भाऊ असल्याचा दावा करत घटक पक्षांना कोंडीत पकडण्याचा प्रयत्न सुरू ठेवला आहे. अशातच थेट उपमुख्यमंत्री एकनाथ शिंदे यांनी सांगली जिल्ह्यात तीन शिलेदारांची निवड केली आहे.

त्यामुळे आगामी महापालिका, जिल्हा परिषद, नगरपालिका निवडणुकीच्या तोंडावर शिवसेनेला बळ मिळणार आहे. एकनाथ शिंदे यांच्या शिवसेनेने आता जिल्ह्याला तीन जिल्हाप्रमुख दिले आहेत आनंदराव पवार यांच्यासह आता संजय विभूते, बजरंग पाटील यांच्याकडे जिल्हाप्रमुखपदाची जबाबदारी सोपवण्यात आली.

भाजपमधून काँग्रेसमार्गे शिवसेनेत दाखल झालेल्या मोहन वनखंडे यांच्याकडे महानगर प्रमुखपदाची धुरा सोपवण्यात आली. याबाबत अधिकृत निवडीची घोषणा उपमुख्यमंत्री एकनाथ शिंदे, उद्योगमंत्री उदय सामंत, शिवसेनेचे सचिव संजय मोरे आणि खानापूर विधानसभा मतदारसंघाचे शिवसेनेचे आमदार सुहास बाबर, जिल्हा संपर्कप्रमुख राजेश शिरसागर यांच्या मान्यतेने झाली आहे.

जिल्ह्यात पक्षसंघटन विस्तारासाठी आमदार सुहास बाबर यांच्याकडेही संघटन प्रमुखपदाची जबाबदारी देण्यात आली. शिंदेंच्या शिवसेनेत सत्ता आणि पदांचे विकेंद्रीकरण केले जाईल, असे संकेत देण्यात आले होते. आनंदराव पवार यांच्याकडे इस्लामपूर, शिराळ्यासह पलूस-कडेगाव विधानसभा मतदारसंघाची जबाबदारी असेल. संजय विभूते यांना खानापूर-आटपाडी, तासगाव-कवठेमहांकाळ आणि जत विधानसभा क्षेत्रासाठीचे जिल्हाप्रमुख पद देण्यात आले आहे.

बजरंग पाटील हे सांगली आणि मिरज विधानसभा मतदारसंघाचे प्रमुख असतील. त्यातही महापालिका क्षेत्रप्रमुख मोहन वनखंडे यांच्याकडे सोपवताना त्यांना कवलापूर, भोसे, मालगाव आणि म्हैसाव्व जिल्हा परिषद गटाची जबाबदारी देण्यात आली. सांगली शहरप्रमुखपदी सचिन कांबळे, तर मिरज शहरप्रमुखपर्द विनायक सूर्यवंशी यांची निवड करण्यात आली. विभूते, पाटील हे दोघेही ठाकरेंच्या शिवसेनेत असताना जिल्हाप्रमुख राहिले होते. त्यामुळे जुन्यांना संधी देण्याचे शिंदेंचे धोरण दिसते आहे.