Kolhapur Politic's : शिवाजी पाटलांची आता मुख्यमंत्र्यांकडे मुश्रीफांच्या राजीनाम्याची मागणी : ‘गोकुळ’वरून जिल्हा बँकेतील कर्जाचा विषय काढला बाहेर

Mumbai/kolhapur : कोल्हापूरच्या गोकुळ दूध संघावर आजपासून (ता. ०५ मे) प्रशासक मंडळ नियुक्त झाले आहे. संघावर प्रशासक आणण्याची मागणी आमदार शिवाजी पाटील यांनी करत वैद्यकीय शिक्षण मंत्री हसन मुश्रीफ यांच्यावर आरोप केले होते.

दरम्यान संचालक मंडळाची मुदत संपताच आजपासून गोकुळ दूध संघावर प्रशासकराज सुरू झाले आहे. प्रशासक नेमल्यानंतर चंदगडचे आमदार शिवाजी पाटील (Shivaji Patil) यांनी सह्याद्री अतिथीगृह येथे जाऊन मुख्यमंत्री देवेंद्र फडणवीस यांची भेट घेतली. या भेटीदरम्यान आमदार पाटील यांनी मुख्यमंत्री फडणवीस यांचे आभार मानले.

गोकुळमधील गैरकारभाराबाबत प्रशासक नेमण्याची आमदार पाटील यांनी मागणी केली होती. या भेटीनंतर वैद्यकीय शिक्षण मंत्री हसन मुश्रीफ (Hasan Mushrif) यांच्यावर आमदार शिवाजी पाटील यांनी पुन्हा एकदा आरोप केले आहेत. शिवाय मंत्री मुश्रीफ यांच्या राजीनाम्याची मागणी केली आहे.

गोकुळ दूध संघ प्रकरणी मंत्री हसन मुश्रीफ यांनी राजीनामा द्यावा. जर काही केलं नसेल तर मंत्री मुश्रीफ एवढे घाबरत का आहेत? असा सवाल आमदार पाटील यांनी केला आहे.

कोल्हापूर जिल्ह्यातील अनेक नेते हे मुश्रीफ यांच्या दबावाखाली आहेत. जिल्हा मध्यवर्ती बँकेमार्फत कर्ज देण्यात आल्याने अनेक संस्था दबावाखाली आहेत. म्हणूनच गोकुळ प्रशासकाला मुश्रीफ आणि काही नेत्यांचा विरोध आहे, असा आरोप आमदार शिवाजी पाटील यांनी केला.

त्या दिवशी गुलाल लावून हसन मुश्रीफ सविस्तर उत्तर देईल

दरम्यान, आमदार शिवाजी पाटील यांच्या या आरोपामुळे आता वैद्यकीय शिक्षण मंत्री हसन मुश्रीफ काय उत्तर देणार, याकडे सर्वांचे लक्ष लागले आहे. कोल्हापुरात बोलताना मुश्रीफांनी गोकुळमधील प्रशासकाबाबत भाष्य केले आहे. गोकुळ दूध संघाच्या निवडणुकीचा ज्या दिवशी निकाल लागेल, त्या दिवशी गुलाल लावून हसन मुश्रीफ सविस्तर प्रतिक्रिया देईल, असे त्यांनी म्हटले आहे.