Thackeray Sena : आघाडीने डावलले तरीही ठाकरेंची सेना पडली भारी; 4 जण नगराध्यक्षपदाचे दावेदार

Kolhapur News : लोकसभेपाठोपाठ विधानसभा निवडणुकीत देखील पराभवाला सामोरे जावे लागल्यानंतर नगरपालिका नगरपंचायत निवडणुकीमध्ये ठाकरेंच्या शिवसेनेकडून निकराची लढाई सुरू आहे. कोल्हापूर जिल्ह्यात चार नगरपालिकामध्ये थेट नगराध्यक्षपदासाठी तर अन्य ठिकाणी पन्नासहून अधिक उमेदवार 'मशाल' चिन्हावर निवडणूक लढवत आहेत. उपमुख्यमंत्री एकनाथ शिंदे यांच्या शिवसेनेपेक्षा अधिक जागा ठाकरेंच्या सेनेने मिळवल्या आहेत. मात्र त्या विजयापर्यंत नेण्यासाठी त्यांना संघर्ष करावा लागणार आहे.

जिल्ह्यातील 13 पैकी 4 नगरपालिकेत कागल, मलकापूर, हातकणंगले आणि हुपरी या चारही ठिकाणी नगराध्यक्षपदासाठी उमेदवार रिंगणात आहेत. उवीरित ठिकाणी मशाल दिसणार नाही. पेठ वडगावसह अन्यठिकाणी स्थानिक आघाङ्यांसह महाविकास आघाडी असा पर्याय निवडला आहे. शिवसेना उद्धव बाळासाहेब ठाकरे पक्षाच्यावतीने नगरपालिका-नगरपंचायतीच्या निवडणुकीत पक्षाच्या 'मशाल' चिन्हावर निवडणूक लढवून आपली ओळख कायम ठेवण्याचा प्रयत्न केला आहे.

विशेष म्हणजे मशाल घरोघरी पोहोचविण्याचा प्रयत्न स्थानिक जिल्हाप्रमुखांनी केला आहे. शिवसेना (Shivsena) ठाकरे पक्षाने नगरपालिका, नगरपंचायतीच्या निवडणुकीत उमेदवार आयात करण्यापेक्षा पक्षातील पदाधिकारी, कार्यकर्त्यांना संधी दिली आहे. हातकणंगलेमध्ये उच्चशिक्षित अभियंता आणि ३२ वर्षाच्या तरुणाला नगराध्यक्षपदासाठी संधी दिली आहे. हुपरीत शिवसेनेच्या महिला आघाडीच्या प्रमुखांना संधी दिली आहे. इतर ठिकाणीही पक्षाच्या कार्यकर्त्यांना, पदाधिकाऱ्यांना संधी देऊन शिवसेना पक्षाला उभारी देण्याचा प्रयत्न जिल्हाप्रमुखांनी केला आहे.

कागलमध्ये थेट राष्ट्रवादी, भाजपच्या (BJP) विरोधात शड्डू ठोकला आहे. चंदगड, गडहिंग्लज, आजरा, मुरगूड, कागल या ठिकाणीही 16 उमेदवार मशाल चिन्हावर उमेदवार रिंगणात आहेत. मंत्री हसन मुश्रीफ आणि शाहू ग्रुपचे अध्यक्ष समरजितसिंह घाटगे एकत्रित आल्यामुळे काही ठिकाणी महाविकास आघाडी म्हणून लढता आले नाही. म्हणून आघाडीला बाजूला ठेवून ठाकरे सेनेने स्वतंत्र लढत देण्याची तयारी केली आहे.

काही ठिकाणी महाविकासआघाडी आणि महायुतीचा झालेला समझोता पूर्वी उजेडात आला असता तर मशाल चिन्हावरून जिल्ह्यात ठिकठिकाणी नगराध्यक्ष आणि नगरसेवक पदासाठी उमेदवार तयार झाले असते, असाही पदाधिकाऱ्यांचा सूर आहे.

मशाल तेवत ठेवण्याचा प्रयत्न यापूर्वी जिल्ह्यात सहा आमदार आणि दोन खासदार असलेला पक्ष आज केवळ जिल्ह्यातील चार नगरपालिकांमध्ये मशाल चिन्हावरून कार्यकर्त्यांना संधी देत आहे. जिल्हाप्रमुख सुनील शिंत्रे, संजय चौगुले आणि नामदेवगिरी यांच्यासह शिवसेनेचे उपनेते संजय पवार, सहसंपर्कप्रमुख विजय देवणे यांच्या माध्यामातून जिल्ह्मात शिवसेना ठाकरेपक्षाची मशाल तेवत ठेवण्याचा प्रयत्न या निवडणुकीत होत आहे.