Valmik Karad : वाल्मिक कराडने 32 खून केलेत; राष्ट्रवादीच्या आमदाराचा गंभीर आरोप...

Pandharpur, 21 December : बीड जिल्ह्यामध्ये अफगाणिस्तानमधील कंधारपेक्षाही वाईट परिस्थिती आहे. बीड येथील राजकीय नेत्यांनी काही गुंडांना हाताशी धरून मोठी दहशत पसरवली आहे. बीड जिल्ह्यातील मस्साजोग येथील सरपंच संतोष देशमुख यांची हत्यादेखील याच राजकीय गुंडांकडून करण्यात आली आहे. बीड जिल्ह्यातील वाल्मीक कराड नावाच्या व्यक्तीने 32 खून केले आहेत. इतकी या माणसाची प्रचंड दहशत आहे. हा वाल्मीक कराड (Valmik Karad ) मंत्री धनंजय मुंडे यांचा कार्यकर्ता आहे, असा गंभीर आरोप राष्ट्रवादी काँग्रेस शरदचंद्र पवार पक्षाचे आमदार उत्तम जानकर यांनी केला आहे.

ज्येष्ठ नेते शरद पवार आज (ता. 21 डिसेंबर) मस्साजोग येथे जाऊन सरपंच संतोष देशमुख (Santosh Deshmukh) कुटुंबाची भेट घेणार आहेत. त्या पार्श्वभूमीवर आमदार उत्तम जानकर यांनी कॅबिनेट मंत्री धनंजय मुंडे यांच्यावर अप्रत्यक्ष निशाणा साधला आहे.

वाल्मीक कराड याच्या सांगण्यावरून बीड जिल्ह्यामध्ये सुमारे 3200 लोकांवर खोटे गुन्हे दाखल करण्यात आलेले आहेत. अनेक आयएएस अधिकारी वाल्मीक कराड याच्या घरासमोर दरबार भरवतात. इतकी मोठी प्रचंड दहशत या वाल्मीक कराडची आहे. त्याला मंत्री धनंजय मुंडे यांचे राजकीय पाठबळ आहे. त्यामुळे वाल्मीक कराड याची दहशत वाढत गेली आहे, असेही जानकर यांनी सांगितले

वाल्मीक कराड याची दहशत ही काही अलीकडची नाही. देवेंद्र फडणवीस मागील सात वर्षांपासून सत्तेत आहेत, ते स्वतः गृहमंत्री आहेत. त्यांच्याच काळात बीड जिल्ह्यात या लोकांची दहशत सुरू आहे. अशा लोकांविरोधात आम्ही रस्त्यावर उतरून विरोध करू, असा इशाराही आमदार उत्तम जानकर यांनी दिला आहे.

दरम्यान, संतोष देशमुख खून प्रकरणावर मंत्री धनंजय मुंडे यांनी प्रथमच भाष्य केले आहे. माझ्याशी संबंधित लोकांवर विधानसभेत चर्चा होत असताना मी सभागृहात उपस्थित राहणं उचित नाही, त्यामुळे गेली दोन ते तीन दिवस मी सभागृहात उपस्थित नव्हतो, असे स्पष्टीकरण दिले. तसेच, संतोष देशमुख यांच्या खूनप्रकरणी आरोपींना फाशीची शिक्षा द्यावी, अशी अपेक्षाही व्यक्त केली.