VBA Kolhapur: 'वंचित' कोल्हापूर, इचलकरंजी महापालिका निवडणुकीच्या रिंगणात; प्रस्थापितांच्या अडचणीत वाढ

महाविकास आघाडी विरुद्ध महायुती असा सामना कोल्हापूर, इचलकरंजी महानगरपालिकेमध्ये होण्याची शक्यता असतानाच प्रस्थापितांच्या अडचणीत वाढ करणारा निर्णय वंचित बहुजन आघाडीने घेतला आहे. या दोन्ही महानगरपालिका निवडणुकीमध्ये वंचित बहुजन आघाडी स्वतंत्रपणे निवडणुकीच्या रिंगणात उतरणार असल्याची माहिती शहर जिल्हाध्यक्ष अरुण सोनवणे यांनी दिली आहे.

पश्चिम महाराष्ट्रातील कोल्हापूर आणि इचलकरंजी महानगरपालिकेसाठी स्वबळावर वंचितचे उमेदवार उभा करणार असून महापालिकेच्या सर्वच प्रभागात उमेदवार देणार आहे. शिवाय सत्तेतील एका पक्षासोबत बोलणी ही सुरू असल्यास त्यावेळी स्पष्ट करण्यात आले आहे. मात्र, अद्याप या आघाडीला अवधी असल्याने भाजप दोन्ही राष्ट्रवादी, शिवसेना आणि काँग्रेस पक्षांकडून वंचित बहुजन आघाडीला समविचारी पक्ष म्हणून आघाडीत स्थान मिळणार का? याकडे राजकीय क्षेत्राचं लक्ष लागलं आहे.

कोल्हापूर महापालिकेसाठी 81 इचलकरंजी महानगरपालिकेच्या 65 जागांसाठी निवडणुकीची रणधुमाळी सुरू झाली आहे. कोल्हापूर आणि इचलकरंजी महानगरपालिकेसाठी जास्तीत जास्त जागा पदरात पाडून घेण्याचा प्रयत्न पक्ष राष्ट्रीय पक्षाचा आहे. इचलकरंजी, कोल्हापूरमध्ये भाजप सर्वाधिक जागा मिळवण्याचा प्रयत्नांत आहे. त्यापाठोपाठ शिवसेना आहे, तर महाविकास आघाडीत काँग्रेस सर्वाधिक जागा घेण्याच्या प्रयत्नांत आहे. त्यामुळे राष्ट्रवादी काँग्रेस, राष्ट्रवादी काँग्रेस शरद पवार पक्ष, शिवसेना ठाकरे गट प्रयत्न करत आहे. पहिल्या टप्प्यात जागावाटपात अडचणीत येत असताना वंचित बहुजन आघाडीने कोल्हापूर महापालिकेसाठी मेळावा घेत रणशिंग फुंकले आहे.

कोल्हापूर महापालिकेसाठी वंचित बहुजन आघाडीकडून 20 प्रभागात 81 उमेदवार निवडणुकीच्या रिंगणात उतरवणार आहोत. प्रकाश आंबेडकर यांच्या उपस्थित विजयी संकल्प महासभा घेत हा निवडणुकीचा एल्गार केला आहे, अशी माहिती शहर जिल्हाध्यक्ष अरुण सोनवणे यांनी दिली.

कोल्हापूरच्या निवडणुका म्हणजे ‘बंटी आणि बबली'

वर्तमान निवडणूक परिस्थितीवर भाष्य करत त्यांनी विनोदी शैलीत म्हटले, “कोल्हापूरच्या निवडणुका म्हणजे ‘बंटी आणि बबली’सारख्या झाल्या आहेत. गदारोळ आहे, परंतू मुद्द्यांचा अभाव आहे. बिहारच्या निवडणुकीत काटेकोर लढत होईल, असे भासवले गेले, पण प्रत्यक्षात लढत झालीच नाही. इथेही तसाच प्रकार दिसू नये.”