Raj Thackeray Meet Uddhav Thackeray : मोठी बातमी! राज ठाकरे 'मातोश्री'वर, 22 दिवसांत दुसऱ्यांदा उद्धव ठाकरेंना भेटले, कारणही आहे खास!

Raj Thackeray News : आगामी महापालिका निवडणुकीत राज ठाकरे-उद्धव ठाकरे यांची युती होणार असल्याची चर्चा सुरू आहे. पाच जुलैला मराठीच्या मुद्यावर एकत्र आलेले ठाकरे बंधू पुन्हा 22 दिवसानंतर भेटले आहेत. राज ठाकरे यांनी मातोश्रीवर जात उद्धव ठाकरेंची भेट घेतली.

आज (रविवार) उद्धव ठाकरे यांचा वाढदिवस आहे. त्यानिमित्त राज ठाकरे हे शुभेच्छा देण्यासाठी मातोश्रीवर दाखल झाले आहेत. मातोश्रीवर मनसे आणि शिवसेना उद्धव बाळासाहेब ठाकरे पक्षाच्या नेत्यांची, कार्यकर्त्यांची मोठी गर्दी झाली आहे. दरम्यान या पूर्वी अमित ठाकरे यांच्या लग्नाचे निमंत्रण देण्यासाठी राज ठाकरे मातोश्रीवर गेले होते.

शिवसेनेतून बाहेर पडल्यानंतर राज ठाकरे हे पहिल्यांदाच उद्धव ठाकरे यांना शुभेच्छा देण्यासाठी मोतश्रीवर दाखल झाले आहेत. राज यांच्यासोबत नितीन सरदेसाई, बाळा नांदगावकर हे मनसेचे नेते देखील उपस्थित होते.

हिंदी सक्तीविरोधात दोन्ही ठाकरे बंधू पहिल्यांदाच पाच जुलैला एकत्र आले होते. त्यावेळी उद्धव ठाकरेंनी एकत्र राहण्यासाठी एकत्र आलो असल्याचे जाहीर केले होते. मात्र, राजकीय युती संदर्भात दोघांनी कोणतेही भाष्य केले नव्हते. मात्र, आगामी मुंबई महापालिकेच्या निवडणुकीच्या दृष्टिने दोन्ही ठाकरे बंधू एकत्र येणार असल्याची चर्चा होती.

शिवसैनिक, मनसेसैनिकांमध्ये उत्साह

22 दिवसानंतर राज-उद्धव ठाकरे पुन्हा भेटत असल्याने मनसे आणि शिवसेना उद्धव बाळासाहेब ठाकरे पक्षातील नेते आणि कार्यकर्त्यांमध्ये मोठा उत्साह दिसून येत आहे. मातोश्रीच्या अंगणात दोन्ही ठाकरे बंधू एकत्र आले तेव्हा मनसेसैनिक आणि शिवसैनिकांनी एकच जल्लोष केला.