Raj Thackeray News : 'मला भेटायला येऊ नका...', राज ठाकरेंनी आवाहन करताना सांगितलं खरं कारण

Raj Thackeray Politics : शिवसेना उद्धव बाळासाहेब ठाकरे पक्ष आणि मनसेच्या युतीच्या चर्चा सुरू आहेत. मनसेला अजून युतीसंदर्भात प्रस्ताव मिळाला नसल्याचे सांगितले जात आहे. त्यात 14 जूनला राज ठाकरेंचा वाढदिवस आहे. त्यादिवशी उद्धव ठाकरे हे राज ठाकरेंच्या घरी त्यांना शुभेच्छा देण्यासाठी जाणार असल्याच्या देखील चर्चा होत्या. मात्र, मनसेच्या कार्यकर्त्ये, पदाधिकाऱ्यांना राज ठाकरे यांनी आवाहन करत त्यांच्या वाढदिवसाच्या दिवशी त्यांना भेटायला येऊ नका, असे सांगितले आहे.

राज ठाकरेंनी महाराष्ट्र सैनिकांनो आणि हितचिंतकांना भेटायला न येण्यामागचे कारण देखील सांगितले आहे. त्यांनी ट्विटवरून तसे पत्र देखील प्रसिद्ध केले आहे. त्यामध्ये म्हटले आहे की, 'येत्या 14 जून 2025 वा म्हणजे अर्थातच माझ्या वाढदिवसाच्या दिवशी आपली भेट होणं शक्य नाही, कारण या दिवशी मी सहकुटुंब मुंबई बाहेर जात आहे.'

तुमच्या आणि किंवा इतरांच्या मनाl हा प्रश्न येईल की मी वाढदिवस साजरा का करणार नाहीये? काही विशेष कारण आहे का ? इत्यादी पण मनापासून सांगतोय की असं कोणतंच कारण नाहीये. त्यामुळे येत्या १४ जूनला तुम्हाला भेटता येणार नाही, याचे कोणतेही अर्थ काढू नका, असे देखील राज ठाकरे यांनी म्हटले आहे.

रुखरुख लागेलच

राज ठाकरे यांनी आपल्या पत्रात पुढे म्हटले आहे की, 'गेली अनेक दशकं माझ्या वाढदिवसाला महाराष्ट्राच्या कानाकोपऱ्यातून तुम्ही सगळे जणं येता, तुमच्याशी त्या दिवशी बोलणं होत नाही पण तुमचं दर्शन, तुमच्या अनेकांशी होणारी भेट ही ऊर्जा देणारी असते. मी आयुष्यात सर्वात जास्त काही कमावलं असेल तर तुम्हा सर्वांच अफाट प्रेम ! आणि या प्रेमाबद्दल मी तुमचा आयुष्यभर ऋणी आहे आणि पुढे देखील राहीन. या वाढदिवसाला तुमची भेट होणार नाही. यामुळे त्याची मला रुखरुख लागेलच!',

लवकरच होणार भेट!

आपल्या वाढदिवसादिवशी भेट होणार नसली तरी लवकरच मी तुमच्या भेटीला येईन. महाराष्ट्र सैनिकांना भेटायला, त्यांचे दर्शन घ्यायला म्हणून मी येईन तेव्हा आपली भेट होईलच. बाकी तुमच्या शुभेच्छा माझ्यासोबत आहेतच आणि त्या कायम राहतील याबद्दल तिळमात्र शंका माझ्या मनात नाही, असे देखील त्यांनी यांनी म्हटले आहे.