Tejaswi Ghosalkar statement : भाजप की उद्धव ठाकरे ? संचालक झालेल्या तेजस्वी घोसाळकरांनी स्पष्टच सांगितले; म्हणाल्या, साथ सोडणार...

Mumbai News : मुंबई जिल्हा मध्यवर्ती सहकारी बँकेच्या संचालकपदी शिवसेना उद्धव बाळासाहेब ठाकरे पक्षाच्या माजी नगरसेविका तेजस्वी घोसाळकर यांची नियुक्ती करण्यात आली. त्यांचे पती अभिषेक घोसाळकर यांच्या निधनाने रिक्त असलेले संचालकपद तेजस्वी यांना देण्यात आले. मुंबई जिल्हा बँक भाजपच्या ताब्यात असून आमदार प्रवीण दरेकर हे बँकेचे अध्यक्ष आहेत. संचालकपदी वर्णी लागताच तेजस्वी घोसाळकर लवकरच भाजपमध्ये प्रवेश करणार अशा चर्चांना उधाण आले आहे. मात्र, या सर्व सुरु असलेल्या चर्चाना त्यांनी पूर्णविराम देत त्यांनी त्यांची भूमिका स्पष्टपणे मांडली आहे.

माजी नगरसेविका असलेल्या तेजस्वी यांनी काही दिवसांपूर्वी शिवसेना (Shivsena) उद्धव बाळासाहेब ठाकरे पक्षाच्या पदांचा राजीनामा दिला होता. त्यानंतर नाराज असलेल्या तेजस्वी यांची मातोश्रीवर बोलावून उद्धव ठाकरे यांनी समजूत काढली होती. त्यानंतर त्यांचे सासरे विनोद घोसाळकर यांनी आपण आणि तेजस्वी ही उद्धव ठाकरेंसोबत असल्याचे सांगितले होते.

त्यानंतर चार दिवसापूर्वी मातोश्रीवर झालेल्या माजी नगरसेवकाच्या बैठकीला तेजस्वी यांनी हजेरी लावली होती. त्यानंतर शुक्रवारी मुंबई बँकेंच्या संचालकपदी तेजस्वी यांची नियुक्ती झाल्याने भाजप (Bjp) त्यांना आपल्या पक्षात घेण्यासाठी पाऊले टाकत असल्याची चर्चा सुरू झाली होती. मात्र, या सर्व चर्चा फेटाळून लावत मी उद्धव ठाकरे यांच्या पक्षातच राहणार असून त्यांची साथ सोडणार नसल्याचे तेजस्वी घोसाळकर यांनी प्रसार माध्यमाशी बोलताना स्पष्ट केले.

काही दिवसापूर्वी मी पक्षावर नाराज होते पण माझी नाराजी आता दूर झाली आहे. मुंबई जिल्हा मध्यवर्ती सहकारी बँकेच्या संचालकपदी नियुक्ती झाल्यानंतर आता उद्धव ठाकरेंची पुन्हा एकदा भेट घेणार आहे. राजकारण आणि सहकार बाजुला ठेवून समाजकरणाचे काम येत्या काळात करणार असल्याचे तेजस्वी घोसाळकर यांनी सांगितले.

या पूर्वी वेगवेगळ्या क्षेत्रात काम केले आहे. मात्र, सहकार क्षेत्रात पहिल्यांदाच काम करीत आहे. संपर्क साधणारे कसेही संपर्क करतात, मात्र मी उद्धव ठाकरे यांच्या पक्षासोबतच काम करणार असल्याचे सांगत त्यांनी भाजपसोबत जाणार असल्याच्या चर्चाना तेजस्वी यांनी पूर्णविराम दिला आहे.