Nashik Crime News : दादा भुसे नाशिकला गुन्हेगारीमुक्त करू शकतील?

Dada Bhuse on Nashik crime : नाशिक शहरातील वाहनांची जाळपोळ तसेच गुन्हेगारीबाबत थेट विधानसभेत चर्चा झाली. त्यानंतर आता पालकमंत्री दादा भुसे अॅक्शन मोडमध्ये आलेले दिसतात. त्यांनी काल शहरातील विविध भागांना भेटी दिल्या. त्यानंतर त्यांनी आठ दिवसांत नागरिकांना रिझल्ट दिसेल असा विश्वास त्यांनी व्यक्त केला. (Now Dada Bhuse came in to action will it really give results)

पालकमंत्री दादा भुसे (Dada Bhuse) यांनी नाशिक (Nashik) शहरातील गुन्हेगारी नियंत्रणात आणण्यासाठी पोलिसांना (Police) गंभीर पावले उचलण्याच्या सूचना दिल्या आहेत. नागरिकांच्या तक्रारींची दखल घेण्याच्या सूचना त्यांनी केल्या.

वाढत्या गुन्हेगारीला आळा बसण्यासाठी पोलिस ठाणेनिहाय गुन्हेगारीचे ब्लॅक स्पॉट हेरून त्या ठिकाणी सीसीटीव्ही कॅमेरे बसविले जातील. त्यासाठी विशेष निधी मंजूर केला जाईल. क्राईम लेस सिटी म्हणून शहराची ओळख निर्माण होईल, असे पालकमंत्र्यांनी आपल्या शहराच्या दौऱ्यानंतर सांगतिले.

पालकमंत्री भुसे यांनी नाशिक रोड परिसरातील धोंगडे मळ्यात तसेच विहितगाव येथे झालेल्या वाहन तोडफोडीच्या प्रकरणानंतर त्या भागाला भेट देऊन पाहणी केली.

या वेळी त्यांनी स्थानिक नागरिकांशी देखील संवाद साधला. महिनाभरात पोलिस ठाणेनिहाय यादी देण्याची सूचना त्यांनी केली. त्यानंतर पोलिस आयुक्तांसमवेत चर्चा करून जिल्हा नियोजन समिती किंवा राज्य शासनाच्या महाआयटीकडून यासाठी विशेष निधी मंजूर करून घेतला जाईल.

शाळा, महाविद्यालयाच्या शैक्षणिक संस्था, खासगी क्लासेस व येण्या-जाण्याचा परिसर या ठिकाणी टवाळखोर गुन्हेगारांचा उपद्रव वाढल्याच्या तक्रारी येत असल्याने प्राधान्याने या भागामध्ये सीसीटीव्ही बसविले जातील.

ज्या शैक्षणिक संस्थांची आर्थिक परिस्थिती चांगली आहे त्यांनादेखील आवाहन केले जाईल. आपला पाल्य घरातून बाहेर पडल्यानंतर सुरक्षितपणे परततील याची हमी देणारी व्यवस्था निर्माण केली जाईल. जेणेकरून शहरातील प्रत्येक पालक चिंतामुक्त होईल.