Raj Thackeray : नाशिकच्या खड्ड्यांवरून राज ठाकरेंचा घणाघात! आगामी निवडणुकांसाठी कार्यकर्त्यांना दिला ‘हा’ खास कानमंत्र

MMS Nashik news: मनसे प्रमुख राज ठाकरे आज दोन दिवसांच्या नाशिक दौऱ्यावर आले आहे. शहरातील खड्डे आणि महापालिकेच्या कारभाराविषयी नागरिकांतील संताप या पार्श्वभूमीवर हा दौरा महत्त्वाचा आहे.

राज ठाकरे यांचे आज सकाळी नाशिकला आगमन झाले. यावेळी मुंबई नाका येथे त्यांचे जोरदार स्वागत करण्यात आले. पक्षाच्या पदाधिकाऱ्यांसह मोठ्या संख्येने कार्यकर्ते उपस्थित होते. या स्वागतानंतर श्री ठाकरे थेट शासकीय विश्रामगृहावर गेले. येथे शहरातील आणि जिल्ह्यातील पदाधिकाऱ्यांची त्यांनी स्वतंत्रपणे चर्चा केली. पदाधिकाऱ्यांचा कल समजून घेतला.

दुपारच्या सत्रात राज ठाकरे यांनी शहर आणि जिल्ह्यातील काही सामाजिक संस्थांच्या पदाधिकाऱ्यांची चर्चा केली. या बैठकीत त्यांनी सद्य राजकीय स्थिती आणि शहराची दुरावस्था हा प्रमुख विषय होता. यासंदर्भात संस्थांनी राज ठाकरे यांच्याकडे महापालिकेच्या कामकाजाविषयी नाराजीची भावना व्यक्त केली.

तत्पूर्वी मनसेच्या पदाधिकाऱ्यांची त्यांनी शहराच्या सद्यस्थितीत सुरू असलेल्या समस्यांवर आक्रमक होण्यास सांगितले. महापालिकेत सध्या भाजप आणि शिवसेना एकनाथ शिंदे पक्षासह राष्ट्रवादी काँग्रेसची सत्ता आहे. हे नगरसेवक तरी त्यांच्या कारभाराबाबत समाधानी आहेत का? असा प्रश्न त्यांनी केला.

प्रदेश उपाध्यक्ष सलीम शेख, शहर प्रमुख सुदाम कोंबडे, नगरसेविका पवार आणि अन्य पदाधिकारी उपस्थित होते. शासनाची एसआयआर मोहीम सुरू आहे. यामध्ये भाजप सत्तेच्या माध्यमातून अतिशय प्रयत्नपूर्वक आपल्या समर्थकांची नावे समाविष्ट करीत आहे. विरोधी पक्षांच्या मतदारांची नावे वगळली जात आहे.

ज्याला ज्याला निवडणुका लढवायच्या आहेत त्यांनी एसआयआर प्रक्रियेत सहभागी व्हावे. अतिशय जागरूकपणे पाठपुरावा करावा. अन्यथा कितीही परिश्रम आणि सामाजिक कामे केली तरीही आपल्या समर्थक आणि सहानुभूतीदारांची नावे यादीत नसतील तर त्याचा काहीही उपयोग होणार नाही, असे ठाकरे यांनी पदाधिकाऱ्यांना सांगितले.