Nashik NCP News : माजी आमदार आसिफ शेख यांच्याविरुध्द दंगलीचा गुन्हा

NCP Malegaon News : मालेगाव महापालिका आयुक्तांविरुद्ध भ्रष्टाचार, गैरव्यवहार, कमिशनखोरी असे विविध प्रकारचे आरोप करत महानगरपालिकेत आयुक्तांच्या दालनासमोर गोंधळ, घोषणाबाजी व आयुक्तांच्या नामफलकाला काळे फासल्याप्रकरणी राष्ट्रवादी कॉंग्रेसचे जिल्हाध्यक्ष तथा माजी आमदार आसिफ शेख यांच्यासह ३० ते ४० कार्यकर्त्यांविरुद्ध किल्ला पोलिस ठाण्यात दंगल, सार्वजनिक मालमत्तेचे विद्रुपीकरण केल्याप्रकरणी गुन्हा दाखल करण्यात आला आहे. (Riot case against former MLA Asif Shaikh who protested against the Commissioner)

राष्ट्रवादी कॉंग्रेसच्या (NCP) कार्यकर्त्यांनी माजी आमदार शेख यांच्या नेतृत्वाखाली मालेगाव (Malegaon) महापालिकेत जोरदार घोषणाबाजी करत आयुक्तांच्या नामफलकाला काळे फासले होते. शेख यांनी आयुक्तांवर (Commissioner) ठेकेदारांचे धनादेश देण्यासाठी व विविध विकास कामांसाठी बजेट देताना अंदाजपत्रकीय तरतूदीसाठी दहा टक्के कमिशन घेत असल्याचा आरोप केला होता.

महिला बचत गटाच्या पोषण आहार ठेक्यासाठी पाच मनपा अधिकाऱ्यांवर पाच लाख रुपयांची मागणी केली होती. मुकुंदवाडीतील अतिक्रमण हटविण्यास टाळाटाळ केली. दूरध्वनी करुनही कार्यालयात उपस्थित राहिले नाहीत. असे विविध आरोप करत जोरदार टीका केली होती. आयुक्त कार्यालयात असते, तर त्यांच्या तोंडाला काळे फासले असते, असा इशाराही त्यांनी दिला होता.

या वेळी कार्यकर्त्यांनी कमिशनर मुर्दाबाद, दादागिरी नही चलेगी, चोरी चमारी नही चलेगी, कमिशनखोरी नही चलेगी, चोर कमिशनर मुर्दाबाद यांसह विविध घोषणाबाजी केली. आंदोलनकर्ते महानगरपालिकेत हाताला काळी व निळी शाई लावून आले होते.

या प्रकरणी महानगरपालिकेचे सहायक सुरक्षा अधिकारी परेश खलचे (वय ३६) यांच्या तक्रारीवरून माजी आमदार शेख यांच्यासह ३० ते ४० कार्यकर्त्यांविरोधात जमावबंदी आदेशाचे उल्लंघन, आयुक्तांच्या नावाने बदनामीकारक घोषणाबाजी व त्यांच्या तोंडाला काळे फासण्याच्या उद्देशाने येऊन नाम व पदाच्या फलकाला काळी व निळी शाई चोपडून सार्वजनिक मालमत्तेचे विद्रूप केल्याप्रकरणी गुन्हा दाखल करण्यात आला आहे.