Bhandara Mahapalika Election 2025: नगर पालिका आणि नगर पंचायतींमध्ये झालेल्या तिकीट वाटपावरून सर्वच पक्षात रोष निर्माण झाला आहे. काहींनी बंडखोरी करून पक्ष नेतृत्वालाच आव्हान दिले आहे. भंडारा जिल्ह्यातील तुमसर नगर पालिकेत राष्ट्रवादी काँग्रेसने दिलेल्या अधिकृत उमेदवाराच्या विरोधताच राष्ट्रवादीच्याच आमदाराने दंड थोपटले आहे.
आता त्याही पलीकडे जाऊन कार्यकर्त्यांनी राष्ट्रवादी काँग्रेसचे राष्ट्रीय अध्यक्ष प्रफुल पटेल यांच्या विरोधात घोषणाबाजी केली. हे चित्र बघून आता नाराज झालेल्या कार्यकर्त्यांना आवरणे कठीण झाले असल्याचे दिसून येते. भंडारा आणि गोंदिया जिल्ह्यात निर्णय घेण्याचे अधिकार राष्ट्रवादी काँग्रेसने प्रफुल पटेल यांना दिले आहे. त्यांनी आम्ही स्वबळावर लढणार असल्याचे आधीच जाहीर केले होते.
तिकीट वाटपावरून नाराजी निर्माण होऊ शकते याचा अंदाज त्यांना आधीच आला होता. कार्यकर्त्यांच्या बैठकीत त्यांनी आपले मत व्यक्त करताना कोणी स्वतःला बाहुबली समजू नये, असा इशाराही दिला होता. या माध्यमातून त्यांनी कोणी जास्त गडबड करणार नाही याची दक्षता घेतली होती. मात्र तुमसरमध्ये असंतोषाचा बांध फुटला.
राष्ट्रवादी काँग्रेसने नगराध्यक्षपदाचे उमेदवार म्हणून अभिषेक कारेमोरे यांचे नाव जाहीर केले. त्यावरून अधिकच रोष निर्माण झाला. राष्ट्रवादी काँग्रेसचे आमदार राजू कारेमोरे यांनी सुद्धा यास विरोध दर्शवला. मात्र नाव जाहीर होऊन अधिकृत एबी फॉर्म देण्यात आल्याने सर्वांचाच नाईलाच झाला. राष्ट्रवादी युवकचे तहसील अध्यक्ष सागर गभने यांना नगराध्यक्षपदाची उमेदवारी देण्यात यावी अशी सर्वांची मागणी होती.
त्यानंतर आमदार कारेमोरे यांच्यासह त्यांच्या पत्नी, भाजपचे माजी खासदार मधुकर कुकडे या सर्वांनी गभने यांना समर्थन जाहीर केले. उमेदवारी अर्ज भरण्यासाठी गभने यांनी काढलेल्या रॅलत हे सर्व नेते सहभागी झाले. तेव्हाच राष्ट्रवादीतील असंतोष उघड झाला होता. मात्र दोन दिवसात सारेकाही ठीक होईल असे सर्वांना वाटत होते. मात्र त्या उलट असंतोष वाढताना दिसत आहे.
भंडारा, गोंदिया जिल्ह्यात प्रफुल पटेल यांचा शब्द अंतिम मानला जायचा. त्यांचा आदरयुक्त दरारा आहे. त्यांच्या विरोधात कोणी सहसा मत व्यक्त करीत नाही. त्यांनी घेतलेल्या निर्णयाला समर्थनच दिले जायचे. मात्र आता कार्यकर्ते ऐकताना दिसत नाही. प्रफुल पटेल यांच्या विरोधात झालेली घोषणाबाजी बघता राष्ट्रवादीत मोठ्या प्रमाणात नेतृत्वाच्या विरोधात धुसफूस सुरू झाली असल्याचे दिसून येते.
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.