Mungantiwar vs Jorgewar : मंडप कुणाचा? मुनगंटीवार, जोरगेवार समर्थक भिडले, भाजपातील अंतर्गत वाद पुन्हा उफाळला

BJP Internal Conflict in Maharashtra Politics : भाजपचे ज्येष्ठ नेते आणि माजी मंत्री सुधीर मुनगंटीवार आणि चंद्रपूरचे भाजपचे आमदार किशोर जोरगेवार यांच्यात युद्धविराम होण्याची चिन्हे काही दिसत नाहीच. साध्या गणेशोत्सवाच्या मंडपावरून दोन्ही नेत्यांचे समर्थक पुन्हा एकदा आमनेसामने आल्याने मोठा वाद निर्माण झाला आहे. या वादावर दोन्ही नेते मौन बाळगून असले तरी भाजपातील टोकाला गेलेल्या अंतर्गत वादाचे दर्शन यातून दिसून आले.

आमदार जोरगेवार यांना भाजपात घेण्यास मुनगंटीवार यांनी विधानसभेच्या निवडणुकीत जोरदार विरोध केला होता. त्यांच्या विरोधाकडे दुर्लक्ष करून प्रदेश भाजपच्या टीमने त्यांना प्रवेश दिला एवढेच न्हे तर चंद्रपूर विधानसभा मतदारसंघाचे तिकीटही दिले. या विरोधात मुनगंटीवार यांनी थेट केंद्रीय गृहमंत्री अमित शहा यांच्यापर्यंत धाव घेतली होती. मात्र त्याचाही फायदा झाला नाही. जोरगेवार मोठ्या मतांनी निवडून आले.

अनुभव आणि ज्येष्ठत्व या न्यायाने मुनगंटीवार यांचा मंत्रिमंडळात समावेश होईल असे सर्वांनाच वाटत होते. महायुती सरकारने त्यांना मंत्रिमंडळातून डच्चू देऊन एकप्रकारे मुनगंटीवार यांना इशाराच दिला होता. त्यानंतर मुनगंटीवार व जोरगेवार यांच्यातील वितुष्ट आणखीच वाढले.

चंद्रपूर शहर आणि जिल्हा कार्यकारिणीवरून पुन्हा एकदा नव्याने दोन्ही नेत्यांमधील वाद उफाळून आला होता. जिल्ह्यातील सर्वच भाजपातील आजी-माजी नेते जोरगेवार यांच्या बाजूने उभे असल्याचे सध्याचे चित्र आहे. हे बघता मुनगंटीवार यांना वरूनच बाजूला सारले जात असल्याचे स्पष्टपणे दिसून येत आहे. आता छोटे कार्यकर्तेसुद्धा त्यांच्याशी दोन हात करताना दिसत आहेत.

चंद्रपूरमध्ये अनंत चतुर्दशीच्या दिवशी सार्वजनिक गणेश मंडळाच्या विसर्जनाची मोठी यात्रा निघते. या यात्रेचे स्वागत करण्यासाठी विशिष्ट जागी स्वागत मंडप उभारण्यावरून भाजपातील दोन्ही नेत्यांचे समर्थक आपसात भिडले होते. चंद्रपूरच्या मुख्य मार्गावरील लोकमान्य टिळक शाळेजवळ भाजपातर्फे स्वागत मंडप उभारला जातो. याकरिता दोन दिवसांपूर्वीच भाजपचे माजी शहर प्रमुख राहुल पावडे यांनी सुधीर मुनगंटीवार यांच्या माध्यमातून अस्थायी मंडप उभारला आहे.

दुसरीकडे याच जागेवर आमदार किशोर जोरगेवार यांचे समर्थक व भाजपचे शहर अध्यक्ष सुभाष कासनगोटुवार यावर आक्षेप घेऊन भाजपचा मंडप उभारण्याची मागणी केली. त्यावरून दोघांच्या समर्थकांमध्ये चांगलाच वाद निर्माण झाला आहे. यावरून भाजप नेत्यांच्या दोन समर्थकांमधील वाद पुन्हा उफाळून आला आहे. दोघांचेही कार्यकर्ते मंडपावरून आमनेसामने आल्याने वातावरण तंग झाले होते. शेवटी पोलिसांना यात हस्तक्षेप करावा लागला.