Congress News : काँग्रेसने सुरू केली स्वबळाची तयारी, शुक्रवारी इच्छुकांच्या मुलाखती; राष्ट्रवादीच्या आवाहनाकडे दुर्लक्ष

Nagpur News : नगर परिषदा आणि नगर पंचायतीच्या निवडणुका जाहीर झाल्या आहेत. या निवडणुका एकत्रित लढायच्या की स्वबळावर याबाबत कुठल्याच पक्षाचा निर्णय झालेला नाही. सर्वच पक्षांनी स्थानिक नेत्यांना अधिकार दिल्याचा दावा केला आहे. शरदचंद्र पवार यांच्या राष्ट्रवादी काँग्रेसने सन्मानजनक जागा दिल्यास आघाडीत यायला तयार असल्याचे जाहीर केले आहे. मात्र काँग्रेसने यास अद्याप कुठलाही प्रतिसाद दिला नसून नागपूर जिल्ह्यातील सर्व इच्छुकांच्या मुलाखतींचा कार्यक्रम काँग्रेसने जाहीर केला आहे. हे बघता आघाडीची शक्यता मावळल्याची शक्यता वर्तविली जात आहे.

नागपूर जिल्ह्यातील 12 नगर पंचायती आणि 15 नगर परिषदांमध्ये निवडणुका होत आहेत. यात कामठी, उमरेड, वाडी, काटोल, रामटेक, सावनेर, खापा, कळमेश्वर-ब्राम्हणी, नरखेड, मोहपा, मोवाड, वानाडोंगरी, बुटीबोरी, कन्हान-पिपरी आणि डिगडोह (देवी) या नगर परिषदा आहेत. तर महादुला, मौदा, भिवापूर, बहादुरा, कांद्री-कन्हान, बिडगाव-तरोडी, बेसा-पिपळा, पारशिवनी, नीलडोह, कोंढाळी, गोंधनी रेल्वे, येरखेडा ह्या नगर पंचायती आहेत.

स्थानिक निवडणुकीत आघाडीचा निर्णय अद्याप झालेले नाही. तो होईल तेव्हा होईल. प्रदेशाध्यक्षांच्या आदेशानुसार आम्ही आमची प्रोसेस सुरू केली आहे. ज्या स्थानिक स्वराज्य संस्थांमध्ये निवडणुका आहेत तेथील सर्वच इच्छुकांच्या मुलाखती शुक्रवारी (ता. ७) ग्रामीण काँग्रेसच्या (Congress) मुख्यालयात घेण्यात येणार आहेत. आमची इच्छा आघाडीकरून लढायची आहे. मात्र याचा निर्णय अद्याप व्हायचा आहे. वरिष्ठ नेते जे ठरवतील त्यानुसार निर्णय घेतला जाईल. सध्या आम्ही आमची तयारी सुरू केली असल्याचे काँग्रेसचे जिल्हाध्यक्ष आश्विन बैस यांनी सांगितले.

दुसरीकडे राष्ट्रवादी काँग्रेसने (NCP) आघाडीबाबत कोणीच चर्चा करीत नाही. त्यामुळे आम्ही समविचारी पक्ष आणि संघटनांनासोबत बोलणी करीत आहोत. काँग्रेसने सन्मानजनक जागा दिल्यानंतरही तर आम्ही आमच्या आघाडीसोबत या निवडणुका लढणार असल्याचे सांगितले आहे. काँग्रेसने यापूर्वी जिल्हा परिषद आणि विधानसभेच्या निवडणुकीत दगाबाजी केली.

शरदचंद्र पवार यांच्या राष्ट्रवादी काँग्रेसच्या उमेदवारांच्या विरोधात काँग्रेसच्या काही नेते व कार्यकार्त्यांनी बंडखोरी केली होती. त्यांना कोणी रोखले नाही. महिनाभरानंतर सन्मानाने त्यांना पुन्हा पक्षात घेतले. मोठे पद दिले. यावरून ही बंडखोरी काँग्रेस पुरस्कृत असल्याचा आरोप शरदचंद्र पवार यांच्या राष्ट्रवादी काँग्रेसचे जिल्हाध्यक्ष प्रवीण कुंटे पाटील यांनी केला आहे. काँग्रेसने दगाबाजी करणार नाही याची हमी दिल्यास आम्ही आघाडीत येऊ असे कुंटे यांनी म्हटले आहे.