Local Body Election: 'स्थानिक'साठी फडणवीस म्हणतात महायुती, तर शिंदेंचे शिवसैनिकांना स्वबळाचे आदेश?

Nagpur News: महापालिका, जिल्हा परिषद आणि इतर स्थानिक स्वराज्य संस्थांच्या निवडणुकीत महायुती होईल की नाही हे अद्याप ठरले नाही. निवडणुका जाहीर झाल्यावर वरिष्ठ नेते जो निर्णय घेतील तो सर्वांनाच मान्य करायचा आहे. युती झाली किंवा नाही झाली तरी आपल्याला आपली तयारी करणे आवश्यक आहे, असे निर्देश देऊन शिंदे सेनेच्यावतीने पूर्व विदर्भातील सर्व पदाधिकाऱ्यांना तयारीला लागण्याचे निर्देश देण्यात आले. एकूणच अप्रत्यक्षपणे शिवसेनेला (Shivsena) स्वबळावर लढावे लागेल असे संकेत या बैठकीतून देण्यात आल्याचे समोर आले आहे.

शिवसेनेच्या प्रमुख पदाधिकाऱ्यांचा गुरुवारी (ता. 14)हॉटेल सेंटर पॉइंट येथे शिवसेनेच्या प्रमुख पदाधिकाऱ्यांचा मेळावा घेण्यात आला. शिवसेनेचे नेते आणि राज्याचे उद्योगमंत्री उदय सामंत, राज्यमंत्री आशिष जयस्वाल, माजी खासदार राहुल शेवाळे, सचिव संजय मोरे, सचिव भाऊ चौधरी, आमदार कृपाल तुमाने, आमदार नरेंद्र भोंडेकर, पूर्व विदर्भाचे संघटक किरण पांडव, नागपूरचे शहर प्रमुख सुरज गोजे यावेळी प्रामुख्याने उपस्थित होते.

एकनाथ शिंदे (Eknath Shinde) अडीचे वर्षे मुख्यमंत्री असताना त्यांनी प्रचंड कामे केली. अनेक योजना जाहीर केल्या. लाडकी बहीण योजना मास्टर्स स्ट्रोक ठरली. आतासुद्धा महायतीच्या दुसऱ्या पर्वात विदर्भाच्या विकासासाठी मोठ्या प्रमाणात कामे सुरू आहेत. या मेळाव्याला पूर्व विदर्भातील सहा जिल्ह्यांचे जिल्हा प्रमुख, शहर प्रमुख, महिला आघाडीच्या प्रमुख, युवा सेनेचे प्रमुख यांना आमंत्रित करण्यात आले होते.

या सर्व योजनांचा लाभ प्रत्येक नागरिकांपर्यंत पोहचवा. आपली कामे त्यांना सांगा, मतदारांच्या संपर्कात राहा, त्यांच्या अडीअडचणी जाणून घ्या. नव्याने सदस्य नोंदणी करा, अधिकाधिक लोकांना आपल्या पक्षासोबत जोडा, मतदार याद्या तपासा, कुणाची नावे सुटली असले तर नोंदणी करा, युवा मतदारांना पक्षाशी जोडा अस सल्ला यावेळी शिवसैनिकांना देण्यात आला.

स्थानिक स्वराज्य संस्थेच्या निवडणुकीत महायुतीचा निर्णय अद्याप झाला नाही. झाला तर आनंदाने तो स्वीकारायचा आहे. मात्र आपण गाफील राहून चालणार नाही. आपण आपली तयारी करून ठेवायची आहे. स्वबळावर लढण्याची वेळ आली तर आपल्याला आपली ताकद दाखवता आली पाहिजे.

विदर्भात शिवसेनेला मोठा स्कोप आहे. आपली व्होट बँक आहे. स्थानिक स्वराज्य संस्थांच्या निवडणुकीत आपल्याला चांगला निकाल द्यायचा आहे हे लक्षात ठेवा अशा सूचना या मेळाव्यात वरिष्ठ नेत्यांमार्फत देण्यात आला. महायुतीचा निर्णय आपले नेते उपमुख्यमंत्री एकनाथ शिंदे आणि मुख्यमंत्री देवेंद्र फडणवीस हे घेतील. पक्ष पातळीवर जो काही निर्णय होईल त्याची आपणास अंमलबजावणी करावीच असे यावेळी निक्षून सांगण्यात आले.